Uwahoze ari umuyobozi w’umutwe wa Al-Shabab, Mukhtar Robow yemerewe kwiyamamaza muri Somalia, mu matora y’Intara ateganyijwe muri uku kwezi.
Mu mwaka wa 2012, nibwo Mukhtar uzwi ku izina rya Abu Mansoor, yavuye mu nyeshyamba za Al Shabab, akaba yari yarimwe uburenganzira bwo kwiyamamaza na Leta Somalia.
Akanama gashinzwe gutegura amatora i Baidoa, ubu kamuhaye uburenganzira bwo kwiyamamaza kuyobora Intara yo mu Majyepfo ya Somalia.
Umukuru w’akanama gashinzwe gutegura amatora muri ako karere, yavuze ko afite uburenganzira bwo kwiyamamaza kubera ko ari umunya- Somalia nk’abandi bose.
Uyu mugabo, ni umwe mu bashinze umutwe wa Al-Shabab, akaba yarigishijwe ibya gisirikare muri al-Qaida, mu gihugu cya Afghanistan.
Nk’uko BBC ibitangaza, ngo yabaye umwe mu bategetsi bakomeye ba Al-Shabab, yavuye muri uwo mutwe kubera ibyo yise ‘kutumvikana ku bitekerezo’.
Mu kwezi kwa Gatandatu umwaka ushize, bivuye ku nkuru z’uko yari mu biganiro na Leta ya Somalia, Amerika yamukuye ku rutonde rw’abayobora imitwe y’iterabwoba bashakishwa, aho bari bemereye miliyoni eshanu z’amadolari ya amerika ku muntu wese wari kumufata.
