Kuri uyu wa Gatatu ushize, Israel yashyizeho ambasaderi wayo wa mbere mu karere ka Somalia kitandukanyije n’igihugu, ibintu ubutegetsi bwa Mogadishu bwamaganye buvuga ko binyuranyije n’amategeko.
Minisiteri y’ububanyi n’amahanga ya Israel yatangaje ko Michael Lotem yagizwe ambasaderi udatuye muri Somaliland.
Nk’uko byatangajwe na radio y’igihugu muri Israel, KAN, ngo Lotem yabanje kuba ambasaderi muri Kenya, Azerbaijan, na Kazakhstan.
Ni nyuma y’uko mu Kuboza 2025, Israel yatangaje ko yemeye Somaliland nk’igihugu gifite ubwigenge, igikorwa cyamaganwe na Guverinoma ya Somalia kandi kinengwa n’ibindi bihugu byinshi ku Isi.
Kuri uyu wa Kane, itariki 16 Mata, Somaliya yamaganye byimazeyo ishyirwaho rya ambasaderi wa Israel mu karere kiyomoye kuri Somalia ka Somaliland, avuga ko ari ukurenga ku busugire bwayo no kurenga ku mategeko mpuzamahanga, inashimangira ko aka karere kazakomeza kuba igice cy’igihugu.
Somaliland, itarigeze yemerwa ku mugaragaro nk’igihugu kuva yatangaza ubwigenge yiyomora kuri Somalia mu 1991, ikora nk’inzego zigenga z’ubutegetsi, politiki, n’umutekano, mu gihe guverinoma y’i Mogadishu idashobora kugenzura aka karere ndetse n’ubuyobozi bwayo bwananiwe kuyihesha ubwigenge ku rwego mpuzamahanga.
