Abanyapolitiki benshi bo muri Sudani bari bafunzwe kuva igisirikare cyahirika ubutegetsi ku itariki ya 25 Ukwakira bafunguwe nk’uko byatangajwe kuri uyu wa Mbere mu rwego rwo kubahiriza amasezerano yagezweho ku Cyumweru yo gusubiza Minisitiri w’Intebe, Abdalla Hamdok ku mwanya we.
“Nafunguwe mu masaha akuze ku Cyumweru mu gihe nari mfungiwe mu kato guhera ku itariki 25 Ukwakira, naratandukanyijwe n’Isi byuzuye,” uyu ni Omar al-Daguir, umuyobozi w’Ishyaka rya Kongere (Congress Party).
Uyu yari yatawe muri yombi nyuma y’ihirikwa rya guverinoma y’inzibacyuho kimwe n’abandi bayobozi b’abasivili bo muri Sudani, harimo abari basangiye ubutegetsi n’abasirikare kuva Omar Bashir yavanwa ku butegetsi mu 2019.
Minisitiri w’Intebe Hamdok wari wahagaritswe nawe agafungirwa iwe mu rgo, yongeye kugaragara mu ruhame ku Cyumweru gishize ku nshuro ya mbere kuva haba ihirikwa ry’ubutegetsi.
Yari amaze gusinyana na Gen. Abdel Fattah al-Burhan, wahiritse ubutegetsi, amasezerano agizwe n’ingingo 14, zirimo kumusubiza umwanya we no gufungura abayobozi b’abasivili bafunzwe nk’uko iyi nkuru dukesha AFP ivuga.
Hafunguwe kandi abandi banyapolitiki b’abasivili benshi barimo abakada b’ishyaka al-Oumma, rinini kurusha andi yo muri iki gihugu.
Ni nyuma y’imyigaragambyo ikaze y’abaturage yari imaze iminsi yamagana kwigarurira ubutegetsi kw’igisirikare inasaba irekurwa ry’abayobozi b’abasivili bari bafunzwe, abagera kuri 41 mu bigaragambya bakaba barasize ubuzima muri iyo myigaragambyo.
