Abasirikare b’u Rwanda bari mu butumwa bw’amahoro bw’Umuryango w’Abibumbye muri Sudani y’Epfo (UNMISS) muri Leta ya Upper Nile, kuwa Gatandatu bakoze ibikorwa by’ubufatanye hagati y’abasirikare n’abaturage.
Ibi bigamije kurushaho gushimangira umubano hagati yabo n’abaturage mu Nkambi yo Kurinda Abaturage ya Malakal (Malakal PoC Camp) nk’uko bitangazwa na Minisiteri y’Ingabo y’u Rwanda.
Itsinda ry’Abagore rishinzwe kwegera Abaturage b’Igitsinagore (Female Engagement Team) ryateguye umukino wa Volleyball hagamijwe guteza imbere ubumwe n’icyizere, ryerekana tekiniki zo kwirwanaho, ndetse rinahugura abakobwa bakiri bato uburyo bwo kwirinda ihohoterwa rishingiye ku gitsina, kwirinda malariya, no gukoresha neza amazi meza yo kunywa.
