Perezida wa Tanzania, Samia Suluhu Hassan, kuri uyu wa mbere yagaragaye mu ruhame ku nshuro ya mbere yambaye agapfukamunwa ari mu gihugu cye.
Ni nyuma y’uko Perezida John Pombe Magufuli yasimbuye atari yarigeze na rimwe agaragara yambaye agapfukamunwa, ndetse akaba yari yarakunze gukerensa icyorezo cya COVID-19 karinda gukwirakwira.
Perezida Samia yagaragaye bwa mbere muri Tanzania yambaye agapfukamunwa, ubwo yari i Dar Es Salaam aho yaganiriraga n’abageze mu za bukuru barenga 800.
Uyu mukuru w’igihugu cya Tanzania yaherukaga kugaragara yambaye agapfukamunwa ari i Nairobi muri Kenya, aho yari yagiriye uruzinduko rw’iminsi ibiri.
Aganira n’abageze mu zabukuru, Perezida Samia Suluhu yavuze ko byabaye ngombwa ko bambara udupfukamunwa kuko bafite ibyago byinshi byo kwandura COVID-19.
Ati: “Turisegura, imibereho yacu yahindutse, twaje hano uyu munsi twambaye udupfukamunwa kuko abasaza bafite ibyago byinshi byo kwandura iyi ndwara, ni ngombwa rero ko tubarinda.”
Perezida Samia Suluhu yagaragaye yambaye agapfukamunwa, mu gihe kuva yagera ku butegetsi yakunze kugaragaza ko yiteguye gufata umurongo utandukanye n’uwa Magufuli mu guhashya kiriya cyorezo.
Samia aherutse gushyiraho Komisiyo y’inzobere zigomba kwiga uko icyorezo cya COVID-19 gihagaze muri Tanzania, ikamugira inama ku ngamba zafatwa mu rwego rwo kurinda abaturage iriya ndwara.
Perezida Samia yabwiye abageze mu zabukuru yari kumwe na bo ko Komite yashyizeho iri gukora akazi kayo neza ndetse ikaba igomba kumuha raporo, ku buryo hazafatwa ingamba zikomeye zo kurinda abasaza korekwa na kiriya cyorezo.
