Umuyobozi w’umuryango mpuzamahanga wita ku buzima (WHO), ishami rya Afurika, Dr Matshidiso Moeti kuri uyu wa 17 Kamena 2021 yatangaje ko Tanzania yasabye kwinjizwa muri gahunda ya COVAX kugira ngo ihabwe inkingo za Covid-19.
Dr Moeti mu nkuru dukesha ibiro ntaramakuru by’Abongereza, Reuters, yagize ati: “Twakiriye amakuru y’uko Tanzania ishaja kwinjira muri gahunda ya COVAX.”
COVAX ni gahunda ishyigikiwe n’imiryango nka WHO igamije gukusanya no kugeza inkingo za Covid-19 mu bihugu bikennye no mu biri mu nzira y’iterambere, nta kiguzi.
Tanzania ni igihugu cyafatwaga nk’igikerensa iki cyorezo ku butegetsi bwa Dr John Pombe Magufuli, aho yagiye avuga ko nta kiriyo, anashimangira ko atazigera ahagarika ibikorwa biteza imbere abaturage nk’uko ibindi bihugu bibigenza mu rwego rwo gukumira ikwirakwira ryacyo.
Dr Magufuli kandi yigeze kubwira abaturage ko atari ngombwa kwambara agapfukamunwa, anatangaza ku mugaragaro ko igihugu cye kitazemera gufata inkingo z’iki cyorezo zituruka mu mahanga kuko atari azizeye, asaba abaturage gukoresha ubwirinzi gakondo.
Ku butegetsi bushya bwa Perezida uriho ubu, Samia Suluhu Hassan habayeho impinduka zigaragara mu rwego rwo kwirinda iki cyorezo, aho nyuma y’igihe gito afashe izi nshingano, yahise ashyiraho itsinda ry’impuguke ryiga ku miterere yacyo mu gihugu.
Ashingiye ku byavuye mu bushakashatsi bw’izi mpuguke, Perezida Samia yashyizeho ingamba n’amabwiriza byo kwirinda iki cyorezo zirimo: kwambara agapfukamunwa, gukoresha umuti usukura intoki, guhana intera, kwerekana icyemezo cy’uko utanduye Covid-19 ku baturutse mu mahanga no kujya mu kato k’iminsi 14 ku baturuka mu bihugu byibasiwe cyane.
Tanzania kandi iherutse gusaba ikigega mpuzamahanga cy’imari, IMF, inguzanyo ya miliyoni 571 z’amadolari ya Amerika yo kuyifasha guhangana n’ingaruka z’iki cyorezo, ariko kibanza kuyisaba imibare y’abacyanduye.
Iki gihugu giherutse no kwemeza ko kigiye kongera kujya gitangaza imibare y’abanduye Covid-19, igikorwa cyari cyarahagaritse muri Gicurasi 2020.
WHO ivuga ko Tanzania ishobora guhabwa inkingo za Covid-19 mu byumweru bibiri biri imbere.
Kurikira ibiganiro n’amavidewo binyura kuri Bwiza TV
