Muri Tanzaniya, umunyapolitiki Tundu Lissu, utavuga rumwe n'ubutegetsi, arimo yakangishije gutangira imyigaragambyo mishya yo kwiyicisha inzara guhera kuri uyu wa Mbere, itariki ya 26 Ukwakira 2026. Impamvu, nk'uko bivugwa n'itsinda rye ry'abanyamategeko, ni ugushyiraho amategeko yo kugenzura ibintu by'ibanga avugana n'abavoka be, binyuranyije n'icyemezo cy'urukiko.
Uyu muyobozi w'ishyaka ritavuga rumwe n'ubutegetsi afunzwe kuva muri Mata 2025 kandi akurikiranweho ibyaha byo kugambanira igihugu.
Urubanza rwe ruteganijwe ku itariki ya 6 Ugushyingo; aho aramutse ahamwe n'icyaha ashobora guhanishwa igihano cy'urupfu. Tundu Lissu yari yarigeze gukora imyigaragambyo yo kwiyicisha inzara muri Gicurasi 2025 ashaka uburenganzira bwo kwitaba abacamanza imbonankubone.
Kuri iyi nshuro, arasaba uburenganzira bwo kuvugana n'abamwunganira mu mategeko be abacungagereza batabumviriza.
Ku itariki ya 16 Ukwakira nk'uko inkuru dukesha RFI ivuga, Urukiko Rukuru rwa Tanzaniya rwari rwategetse ko abacungagereza baba bari hafi mu gihe avugana n'abavoka be, ariko batumva ibyo bavugana.
Itsinda ry’abamuburanira rivuga ko iki cyemezo kidarakurikizwa muri Gereza ya Ukonga. Nk’uko umwunganizi we umwe abivuga, uyu mugabo utavuga rumwe n’ubutegetsi arateganya gutangira imyigaragambyo yo kwiyicisha inzara kuri uyu wa Mbere no guhagarika gufata imiti ye, nubwo bishobora kubangamira ubuzima bwe.
Tundu Lissu kandi ngo afite impungenge z'umutekano we, nk'uko bivugwa n'umuyobozi mu ishyaka rye, CHADEMA. Bivugwa ko atacyizera ibiryo bitangwa n'ubuyobozi ashinja gusuzugura ibyemezo by'urukiko.
Umuvugizi w'urwego rushinzwe abagororwa yabwiye itangazamakuru kuwa Gatandatu ko barimo gusuzuma ibi birego.
Tundu Lissu w'imyaka 58, warokotse igitero cyari kigamije kumwica mu 2017, yatawe muri yombi muri Mata 2025 nyuma yo gusaba ko habaho ivugurura ry'urwego rushinzwe amatora, icyifuzo avuga ko ntaho gihuriye n'ubugambanyi.
Nyuma y’imyaka myinshi ari mu buhungiro, yagarutse mu gihugu cye mu 2023, nyuma y’uko Perezida Samia Suluhu Hassan akuyeho itegeko ryakumiraga amateraniro y’amashyaka atavuga rumwe n’ubutegetsi, iryo tegeko rikaba ryari ryarashyizweho n’uwo yasimbuye, John Magufuli wayoboye Tanzaniya kuva 2015 kugeza 2021.