Nyuma yo y’amasaha make ikipe ya Tout Puissant Mazembe yo muri Repubulika Iharanira Demokarasi ya Congo isezerewe na Raja Cassablanca yo muri Maroc muri 1/4 cya CAF Champions League, ubu yamaze gusezerera umutoza wayo, Pamphile Mihayo Kazembe wari uyazemo imyaka igera kuri itatu.
Ubu iyi kipe y’umuherwe Moise Katumbi CHAPWE akaba ari na we perezida wayo igiye gusigara itozwa na Drazen Cvetkotic usanzwe ashinzwe tekiniki muri iyi kipe mu gihe hagishakishwa umutoza uza kumusimbura.
Ku mugoroba wo kuri uyu wa Gatandatu tariki ya 07 Werurwe 2020 ni bwo mu Mujyi wa Lubumbashi muri Congo Kinshasa habereye umukino wo kwishyura wa ¼ cya CAF Champions League, iri rikaba ari irushanwa rihuza amakipe yabaye aya mbere mu bihugu byayo ku mugabane wa Afurika aho TP Mazembe yatsindaga Raja Atletic Cassablanca yo mu gihugu cya Maroc igitego 1-0 gusa n’ubwo yatsinze ntibyayibujije gusezererwa kuko mu mukino ubanza wari wabereye muri Maroc yari yaratsinzwe ibitego 2-0.
Uyu mutoza wanakiniye TP Mazembe nk’umukinnyi yavukiye i Lubumbashi tariki ya 17 Nzeri 1976. Mu 2009 yatwaranye n’iyi kipe igikombe cy’isi cy’amakarabu (clubs) nk’umukinnyi ndetse 2010 ayibera kapiteni nabwo bagera ku mukino wa nyuma wacyo ubwo batsindwaga na Inter Milan ibitego 3 ku busa. Nyuma yaje gusezera ku gukina umupira w’amaguru ayoboka ubutoza maze ahabwa gutoza iyi kipe mu 2017.
