Rais wa Marekani, Donald Trump, amethibitisha kuwa mkataba wa amani kati ya Jamhuri ya Kidemokrasia ya Kongo (DRC) na Rwanda utasainiwa Ijumaa hii, tarehe 27 Juni.
Trump alitoa tangazo hilo Jumatano iliyopita, tarehe 25 Juni, huko La Haye, Uholanzi, wakati wa mkutano wa kilele wa NATO.
Uthibitisho huu wa Rais wa Marekani unakuja kufuatia tamko lililotolewa hivi karibuni kuhusu suala hilo, wakati hatua kubwa zinaendelea kufikiwa katika juhudi za kusuluhisha mzozo kati ya mataifa haya mawili.
Ikumbukwe kwamba DRC na Rwanda tayari walisaini tamko la kihistoria mnamo tarehe 25 Aprili, kwa msaada wa Wizara ya Mambo ya Nje ya Marekani huko Washington, ambapo walionesha dhamira ya kisiasa ya dhati ya kumaliza migogoro kupitia njia za amani.
Uhusiano kati ya DRC na Rwanda umeendelea kuwa mgumu, ukiambatana na mvutano unaohusiana na utajiri wa maliasili na usalama wa eneo hilo.
Serikali ya Congo inailaumu Rwanda kwa kusaidia makundi ya waasi mashariki mwa Congo, ikidai kuwa miji mingi imetekwa na jeshi la Rwanda pamoja na waasi wa M23 — madai ambayo Rwanda imekuwa ikikanusha tangu mwanzo.
Watu wengi wanaona kurejea kwa Donald Trump Ikulu kama ishara kali ya kutatua mgogoro wa usalama wa eneo hilo, hasa kutokana na uhusiano wake na wawekezaji wa Kimarekani wanaovutiwa na rasilimali za Kongo.
