Perezida wa Leta Zunze Ubumwe z’Amerika, Donald Trump akomeje gushimangira ko yibwe mu matora, ubu akaba yemeje ko hari amajwi y’abantu 20,000 yabazwe muri Leta ya Pennsylvania kandi abo yitiriwe barapfuye mbere y’uko amatora aba.
Ibyavuye muri leta zitandukanye kuri aya matora yabaye tariki ya 3 Ugushyingo 2020, byerekanye ko Joe Biden wari uhanganye na Trump, ari we watsinze.
Gusa uyu Mukuru w’Igihugu uriho ubu ngubu yavuze ko habayemo uburiganya, amwe mu majwi ntiyabarwa. Kuri ubu yashyigikiye ibyatangajwe n’igitangazamakuru One America News (OANN) cyavuze ko muri Pennsylvania habazwe n’ay’abapfuye.
Iki gitangazamakuru gishyigiye Donald Trump cyagize kiti: “Ibimenyetso by’uburiganya mu batoye bikomeje kwiyongera, harimo abantu 20,000 bapfuye ku rutonde rwa Pennsylvania, hamwe n’ibindi bihumbi mu gihugu cyose. Ubu hacuzwe amajwi ashyigikira Joe Biden.”
Nk’uko byatangajwe n’Ibiro Ntaramakuru by’Abanyamerika tariki ya 7 Ugushyingo 2020, Joe Biden yatsinze amatora ku majwi 290, Donald Trump wamukurikiye agira 217. Nyuma y’aho bigaragariye ko uyu Mukuru w’Igihugu atemera ibyavuyemo, hategerejwe niba azemera kwimukira Biden muri Mutarama 2021 cyangwa se niba inzego zibishinzwe zizabanza kubifataho umwanzuro.
