Rais Félix Antoine Tshisekedi wa Jamhuri ya Kidemokrasia ya Kongo ameahidi kumteua Donald Trump kuwania Tuzo ya Amani ya Nobel endapo ataweza kumaliza vita vinavyoendelea nchini Congo.
Tshisekedi alitoa kauli hiyo katika mahojiano maalum na Hariana Verás Victória, mwandishi wa habari aliyeidhinishwa rasmi na Ikulu ya Marekani barani Afrika.
Utawala wa Rais wa zamani wa Marekani, Donald Trump, umekuwa ukifanya juhudi kubwa kumaliza vita vya miaka mitatu kati ya serikali ya Congo na waasi wa M23. Ijumaa hii, Kinshasa inatarajiwa kusaini makubaliano ya amani na Rwanda, inayotuhumiwa kuunga mkono waasi hao.
Makubaliano hayo yatasainiwa na mawaziri wa mambo ya nje wa mataifa hayo mawili huko Washington DC, Marekani.
Tshisekedi anaelezea makubaliano haya kama suluhisho la mzozo uliodumu kwa zaidi ya miaka 30 mashariki mwa Congo.
Akasema: “Hakuna cha ajabu katika makubaliano haya. Yanawakilisha kukubaliwa kwa mzozo uliodumu kwa karibu miaka 30 na uliosababisha vifo vya mamilioni ya watu na Marekani.”
Tshisekedi alisema vita hiyo si ya kijeshi pekee, bali pia ni ya kiuchumi na nayo lazima itafutiwe suluhisho.
Alisema aliposhika madaraka mwaka 2019, alikaribia nchi jirani za Rwanda, Burundi, na Uganda akiwaomba ushirikiano wa kiuchumi, lakini Rwanda ilichagua kuanzisha vita dhidi ya nchi yake.
Alipoulizwa kuhusu imani yake kwa Trump kama mshirika mkuu katika makubaliano ya amani, Tshisekedi alisema ana imani kubwa kwa sababu Trump mwenyewe alitangaza msimamo huo, na anaongoza taifa lenye nguvu zaidi duniani.
Aidha, alisisitiza kuwa yuko tayari kumuunga mkono Trump kupata Tuzo ya Amani ya Nobel ikiwa ataweza kumaliza kabisa vita hiyo ya Congo.
Akasema: “Iwapo vita hii ya dhuluma itamalizika — vita iliyosababisha vifo vya maelfu kwa maelfu ya watu, wengine wakisema ni zaidi ya Vita ya Pili ya Dunia — basi kama Trump ataweza kuihitimisha kupitia usuluhishi wake, atakuwa anastahili Tuzo hiyo ya Nobel. Nitakuwa wa kwanza kumpendekeza.”
Trump hivi karibuni aliandika kwenye mitandao yake ya kijamii kwamba anastahili Tuzo ya Amani ya Nobel ya mwaka 2026 kwa juhudi zake za kusuluhisha migogoro duniani, ikiwemo ule wa DRC na Rwanda.
