Perezida Félix Antoine Tshisekedi wa Repubulika Iharanira Demokarasi ya Congo, yatangaje ko amatora y’Umukuru w’Igihugu ateganyijwe mu gihugu cye mu myaka ibiri iri imbere atazaba, mu gihe intambara ihanganishije ingabo ze n’inyeshyamba zo mu mutwe wa AFC/M23 muri Kivu zombi izaba ikomeje.
Uyu mugabo mu kiganiro yagiranye n’abanyamakuru ku wa Gatatu, yeruye ati: “Nitunanirwa kurangiza iyi ntambara, ntituzashobora gukora amatora yo muri 2028. Ntidushobora gukora amatora atarimo Kivu y’Amajyaruguru n’iy’Amajyepfo.”
Tshisekedi watanze urugero kuri Ukraine, yashimangiye ko bidashoboka ko amatora yategurwa mu gihe hari ibice by’igihugu cye byafashwe.
Tshisekedi yatangaje ibi mu gihe mu Ukuboza 2023 ubwo yatorerwaga kuyobora RDC muri manda ye ya kabiri, amatora yabaye ariko ntiyitabirwa n’abaturage bo mu bice bitandukanye by’intara ya Kivu y’Amajyaruguru, by’umwihariko abo muri Teritwari za Rutshuru na Masisi zagenzurwaga na AFC/M23.
Muri 2028 biteganyijwe ko ari bwo Tshisekedi azaba asoje manda ebyiri yemererwa n’itegeko nshinga rya Congo Kinshasa.
Uyu mugabo kuri ubu akomeje gukora ibishoboka byose kugira ngo ahindure itegeko nshinga, mu rwego rwo gukomeza kuguma ku butegetsi.
Kuri iyi ngingo, Tshisekedi ku wa Gatatu yavuze ko nta gahunda yo kwiyamamariza manda ya gatatu afite, ariko ko abaturage nibabimusaba azabikora.
Yagize ati: “Abanye-Congo nibansaba kugaruka, ndi ku ruhande rwabo. Niba guhindura itegeko nshinga cyangwa kurivugurura bigomba gukorwa, ntibizabaho abaturage batabanje kugishwa inama kuri kamarampaka.”
Kuri ubu ababikurikiranira hafi n’abanyapolitiki batavuga rumwe n’ubutegetsi bemeza ko Tshisekedi yiteguye gukomeza kwenyegeza intambara mu burasirazuba bw’igihugu cye kugira ngo akomeze kuguma ku butegetsi, mu gihe ibyo guhindura itegeko nshinga byaba bidashobotse.
