Mu kiganiro yagiranye n’abanyamakuru kuri uyu wa 22 Ugushyingo 2019, Minisitiri w’Umutekano w’imbere mu Burundi, Pascal Barandagiye yasabye itangazakuru kudatangaza byose mu matora y’umukuru w’Igihugu azaba muri Gicurasi 2020.
Minisitiri Barandagiye agereranya igihugu mu gihe cyegereje amatora no mu matora n’umugore utwite.
” Igihe cy’amatora gisaba kutavuga buri kimwe kubera ko tumeze nk’umugore utwite, wigegengesera buri uko atambutse kandi ntagire icyo akora.” Minisitiri Barandagiye.
Nk’uko SOS Media yabitangaje, Minisitiri Barandagiye arasaba itangazamakuru guherera mu ruhande rwa leta. Yasezeranyije itangazamakuru ko azongera kugirana inama na ryo kugira ngo aryibutse.
Minisitiri Barandagiye atangaje aya magambo mu gihe hakemangwa umutekano mu Burundi mu gihe cy’amatora bitewe n’ihonyora ry’uburenganzira bw’abaturage riri kuba ku batari mu ishyaka riri ku butegetsi ndetse na bamwe mu bayobozi b’aya mashyaka.
Ubu amashyaka atavuga rumwe n’ubutegetsi avuga ko habaho ukwibasirwa n’abo mu ishyaka riri ku butegetsi, CNDD-FDD, umutwe w’Imbonerakure ndetse bikavugwa ko hari n’abo mu nzego z’umutekano bahonyora uburenganzira bw’abari muri ayo mashyaka.
Mu Burundi havugwa umutekano muke kuva mu 2015 ubwo Perezida Nkurunziza yatangazaga ko aziyamamariza manda ya gatatu, aha byavuzwe ko binyuranyije n’itegekonshinga.
