Umutwe wa Twirwaneho wemeje ko ihuriro ryayo na AFC/M23 birukanye iry’ingabo zirwana ku ruhande rwa Leta ya Kinshasa mu gace ka Gakenke gaherereye mu misozi miremire ya Fizi, mu ntara ya Kivu y’Amajyepfo.
Amakuru y’iyi ntsinzi yemejwe na Colonel Rugabo Fidèle ukunze kugaragara cyane asobanura uko urugamba rwo mu misozi miremire rwifashe.
Rugabo yanditse ku rubuga rwe rwa X ati: “Gakenke cyane cyane ahazwi nko kwa Rutaganda n’umusozi wa Sinai habohowe. FNDB, FDLR, FARDC n’abo bafatanya batataniye mu nzira zirindwi.”
Uyu musirikare yunzemo ko MRDP [Twirwaneho] izakomeza kwirwanaho no kurinda abaturage, inashimangira ko urugamba rukomeje.
Gakenke yafashwe nyuma y’uko ku Cyumweru ingabo za Leta zagerageje ibitero byo kwisubiza uduce zari zatakaje mu mpera z’icyumweru gishize.
Andi makuru kandi avuga ko Twirwaneho yaba yanafashe Mikenke, n’ubwo uyu mutwe utaremeza aya makuru ku mugaragaro.
Utu duce turiyongera ku twa Buhimba, Ilundu, kwa Harera na Ruhinamavi; uduce ingabo za Leta zagenzuraga mbere yo kugerageza gufata Centre ya Minembwe.
