Komisiyo y’igihugu ishinzwe kumenya ukuri no kunywanisha Abarundi, CVR, ivuga ko mu iperereza yakoze yasanze hari abantu bo mu bihugu bihana imbibi n’icyo gihugu bagize uruhare mu bwicanyi bwo mu 1972 cyangwa bamwe bakaba barabwiciwemo.
CVR ivuga ko ibi byabayeho mbere na nyuma ya 1972 ndetse ko yiteguye guha amazina inzego zibishinzwe mu Burundi, zikamenyesha ibihugu abakoze ubwo bwicanyi babamo kugira ngo bakurikiranwe n’ubutabera. Uyobora CVR, Pierre Claver Ndayicariye, mu kiganiro n’abanyamakuru i Bujumbura yavuze ko ibi ” Twakoze iperereza dusanga hari ibimenyetso ntakuka byemeza ko hari abanyamahanga baturuka mu bihugu bihana imbibi n’Uburundi bagize uruhare mu bwicanyi bwo mu 1972.” CVR ntiyemeye gushyira hanze amazina y’aba bantu n’ibihugu bavamo. CVR yagarutse ku kuba mbere gato ya 1972, ubutabera bwahaye imbabazi Abatutsi benshi, nyuma bugakatira urwo gupfa Abahutu benshi. CVR ibi ivuga ko ari akarengane gashingiye ku bwoko. Iyi komisiyo ivuga ko aha ari naho ishingira ivuga ko habaye “Ihonyabwoko ryakorewe Abahutu muri 1972” ryateguwe. CVR ariko ntiyemeranyije na Perezida Evaritse Ndayishimiye wavuze ko hakiri kare kwemeza ko ibyabaye ari jenoside yakorewe Abahutu.
