Abategetsi b’u Burundi bahinduye umuvuno mu bijyanye no kwirinda ikwirakwira ry’icyorezo cya Covid-19 bakomeje gukerensa igihe kirekire, aho kuri ubu bavuye ku izima bagafata icyemezo cyo gufunga ahantu hose hahurira abantu benshi nk’ibibuga by’umupira w’amaguru, ibitaramo, utubari, n’ahandi nyuma y’aho mu byumweru bibiri bivugwa ko hamaze kuboneka abantu basaga 1100 banduye Covid-19 mu Ntara ya Gitega gusa.
Abayobozi mu murwa mukuru wa politiki w’u Burundi, Gitega, bemeye ko icyorezo cya Coronavirus kimaze kunanirana.
Umuyobozi wa Komini ya Gitega, Jacques Nduwimana, yatangarije Ijwi rya Amerika impamvu hari kuboneka umubare munini w’abantu banduye covid-19 bagera muri 600 mu cyumweru muri iyi ntara.
Abaturage nabo bavuga ko babona ingamba zo kwipimisha zitakitabirwa bakaba bagiye kwisubiraho.
Kugirango ubwiyongere bw’ikwirakwira ry’iki cyorezo buhagarikwe muri iyi ntara, umuyobozi w’Intara ya Gitega avuga ko bafashe icyemezo cyo gufunga ahantu hahurira abantu benshi.
Minisiteri y’ubuzima mu Burundi ivuga ko habonetse abarwayi 1,100 mu Ntara ya Gitega, mu gihe mu gihugu hose hamaze kugaragara abantu 13,000. Nubwo bimeze gutyo, muri iki gihugu nta rukingo rwa Covid ruratangira gutangwa mu gihe Banki y’Isi mu kwezi gushize yemereye u Burundi imfashanyo z’inkingo.
Bamwe mu bayobozi b’u Burundi bumvikanye bavuga ko nibahabwa izo nkingo bazazakira bakazibika aho zagenewe, ariko nta muturage bazahatira kwikingiza nubwo uzabikenera araruhabwa ariko ingaruka azahura nazo akazazirengera.
Ibi biravugwa kandi mu gihe umuryango wa Afurika y’Iburasirazuba ugiye gushyiraho uruhushya rw’inzira ruzajya ruhabwa muntu wikingije Covid-19 ari narwo ruzajya rutuma abasha kuva mu gihugu kimwe ajya mu kindi muri 6 bigize umuryango.
Ru ruhushya u Burundi bukaba bwararwamaganye, aho Minisitiri w’Intebe, Alain Guillaume Bunyoni avuga ko uru ruhushya ruzaba ruje gukandangira uburenganzira bw’abaturage bo muri EAC.
EAC yo ivuga ko ari uburyo bwo kwirinda abaturage baturuka mu bihugu bitemera inkingo za Covid-19.
