Mu gihe ibihugu byombi bikomeje intambara y’ubucuruzi, Leta Zunze Ubumwe za Amerika zafatiye ibihano umutwe wa gisirikare w’u Bushinwa kubera ko ngo waba waraguze indege z’intamaba mu Burusiya. U Bushinwa nabwo mu burakari bwinshi bwahise butumiza ambasaderi wa Leta Zunze Ubumwe za Amerika ngo bumumenyesh ko butishimye na gato.
Abategetsi b’u Bushinwa bakaba batangaje ko Washington imaze gukora ikosa riremereye rigiye kurushaho kubangamira imibanire y’ibihugu byombi ndetse n’igisirikare cyabyo.
Leta Zunze Ubumwe za Amerika zishinja u Bushinwa kuba mu myaka 10 ishize bwaraguze indege 10 z’intambara mu Burusiya ndetse na missiles zihanura indege. Kubw’ibi, ngo u Bushinwa bukaba bugomba gufatirwa ibihano by’ubukungu.
Mu Bushinwa, nk’uko iyi nkuru dukesha RFI ikomeza ivuga, uburakari ni bwose. Minisiteri y’ingabo y’iki gihugu iravuga ko Leta Zunze Ubumwe za Amerika zidafite uburenganzira bwo kwivanga mu mibanire y’u Bushinwa n’u Burusiya kuko ibihugu byombi ari ibihugu byigenga.
U Bushinwa bukaba butangaza ko niba Leta Zunze Ubumwe za Amerika zidakuyeho ibihano zafashe zigomba kwirengera ingaruka nubwo hatatangajwe byinshi kuri izo ngaruka.
Nubwo bimeze gutyo, iyi nkuru isoza ivuga ko ibyo bihano bya Amerika n’ubundi bitazahagarika ubufatanye mu bya gisirikare hagati y’u Bushinwa n’u Burusiya, bikomeje kugaragaza ko byumvikana, cyangwa ngo bihagarike ubushake bw’u Bushinwa bwo gutunga uburyo bw’ubwirinzi bwo mu kirere bw’Abarusiya.
