Covid-19 ishobora kuba yaratumye ibibyimba by’umurwayi wa kanseri bizimira, nk’uko abaganga babitangaje, bavuga ko ishobora kuba yarateye ubudahangarwa bwo kurwanya kanseri muri uyu mugabo.
Uyu mugabo w’imyaka 61 wari umurwayi mu bitaro bya Royal Cornwall i Truro, yipimishije mu mpeshyi ishize nyuma yo gufatwa na Hogkin Lymphoma, kanseri idasanzwe y’amaraso yibasira abantu 2100 mu Bwongereza buri mwaka.
Iyi ndwara ibaho iyo selile y’amaraso yera itagishoboye gukwirakwira no mu mitsi, ubusanzwe ivurwa na chimiotherapie kandi abarwayi bagera kuri 90 ku ijana baracyariho nyuma y’imyaka itanu.
Nyuma y’iminsi abwiwe ko igituza cye cyuzuyemo ibibyimba na mbere yo gutangira kwivuza, uyu mugabo yinjiye mu bitaro nyuma yo guhura na Covid ikabije. Amaze gukira neza, yongeye kwipimisha maze asanga kanseri yarazimiye burundu.
Nk’uko byatangajwe na The Telegraphy, ngo gukira Hogkin Lymphoma birashoboka ariko ni gake cyane. Ibi bimaze kuba inshuro zigera mu 10 gusa mu Isi yose.
Ibi bikaba byaratangajwe muri British Journal of Haematology.
Dr Sarah Challoner, wo mu bitaro bya Royal Cornwall, yagize ati: “Turatekereza ko Covid-19 yakanguye ubudahangarwa bw’umubiri burwanya kanseri.”
Dr Challoner yongeyeho ko itsinda ry’abaganga ryizeraga ko uturemangingo twa T (T-cells) turwanya indwara infections mu mubiri, dushobora no kuba twarateye uturemangingo twa kanseri bigatuma tuzimira.
Icyakora, abandi baganga basanga bidakwiye kwihutira gufata umwanzuro hakiri kare ku mpamvu yo gukira. Martin Ledwick, umuforomo ushinzwe amakuru ku bijyanye na kanseri mu Bwongereza, yagize ati: “Kuri iki cyiciro, haracyari kare gufata imyanzuro iyo ari yo yose, birashoboka ko ari impanuka.
“Umuntu wese uri kwivuza kanseri agomba gukomeza gukurikiza inama za muganga we, ndetse no kwirinda gufatwa na Covid-19, kandi turashishikariza abantu bose babishoboye gufata urukingo.”
Raporo y’ikinyamakuru cy’ubuvuzi cyo mu Butaliyani, Acta Biomedica, yasohotse umwaka ushize, yerekanye ko mu bitaro bya Cremona mu Butaliyani naho habaye ibintu nk’ibi.
Kurikira ibiganiro n’amavidewo binyura kuri Bwiza TV
