Umunyamabanga w’Ubwami bw’u Bwongereza (U.K) ushinzwe ubuzima, Matt Hancock mu kiganiro n’itangazamakuru kuri uyu wa 1 Gashyantare 2021, yatangaje ko iki gihugu cyabonetsemo abantu 105 banduye ubwandu bushya bwa Coronavirus bwaturutse muri Afurika y’Epfo.
Nk’uko igitangazamakuru Sky kimaze kubitangaza, Hancock yatangaje ko abantu 11 muri aba banduye iyi Coronavirus, bigaragara ko nta ngendo mpuzamahanga bigeze bakora.
Yakomeje avuga ko bose hamwe uko ari 105 babonetse mu duce umunani, ari two:W7, N17 na CR4 muri Londre, WS2 muri Walsall, ME15 muri Maidstone, PR9 muri Southport, EN10 muri Broxbourne na GU21 muri Woking, mu bipimo 80,000 byari bimaze gufatwa.
Abatuye muri utu duce bose basabwe kujya mu kato, bose bagapimwe; n’ababa batagaragaza ibimenyetso. Ngo ibi bigomba gukorwa mu rwego rwo gukumira ko ubu bwandu bwakwirakwira mu bice bice by’igihugu.
Ubu bwandu ni bwo bwatumye tariki ya 28 Mutarama 2021 Guverinoma y’u Bwongereza ifata icyemezo cyo gukumira abagenzi baturuka mu bihugu birimo u Rwanda, u Burundi na Leta Zunze Ubumwe z’Abarabu (UAE), mu gihe cy’ibyumweru bibiri.
Nk’uko itangazo rya Guverinoma y’iki gihugu ribivuga, hari impungenge z’uko ubu bwandu bwagera no muri ibi bihugu, abagenzi babiturukamo bakaba babugeza mu Bwongereza.
