Mu gihe ku isi abantu bagera kuri miliyoni 100 bamaze kwandura Covid19, Ikigo cy’ubushakashatsi Lowy Institute cy’i Sydney muri Australia, cyatangaje uko ibihugu hafi 100 ku isi biri kwitwara mu guhangana na Covid-19, u Rwanda ruza mu bihugu 10 bya mbere. Brazil niyo iza inyuma y’ibindi, Leta zunze ubumwe za Amerika nazo ziza mu bihugu 10 bya nyuma bihagaze nabi imbere y’iki cyorezo.
Lowy Institute ivuga ko yashingiye ku bipimo bitandatu ikora ubwo bushakashatsi n’ingereranya ry’ibihugu, ibyo birimo ingano yo gupima iyi virusi ku mubare w’abaturage, imibare y’abandura, imibare y’abapfa, gusesengura amakuru atangwa n’izindi.Nkuko Bbc ibitangaza , Iyi raporo igira iti: “Ubishyize hamwe, ibi bipimo byerekana niba ibihugu bihagaze neza cyangwa nabi mu guhangana n’iki cyorezo”
Uru rutonde rugaragaza ko New Zealand ari yo ya mbere mu guhashya iki cyorezo kubera gahunda za ‘guma mu rugo’ no gupima benshi – Vietnam, Taiwan, Thailand, Cyprus, u Rwanda, Iceland, Australia, Latvia na Sri Lanka nibyo biza mu bihugu 10 bya mbere. Raporo ya Lowy Institute itondekanya ibi bihugu ishingiye kuri ibyo bipimo bitandatu igatanga amanota ku 100, u Rwanda rufite 80%, ikindi gihugu cya Africa kiri hafi kuri urwo turonde ni Togo ya 15.
Mu kwezi kwa gatatu tariki ya 21 umwaka ushize, u Rwanda rwatangaje ‘guma mu rugo’ (lockdown) mu gihugu hose mbere y’ibindi bihugu byo muri Africa yo munsi y’ubutayu bwa Sahara, icyo gihe hari hamaze kuboneka 17 gusa banduye Covid. Muri iki gihe coronavirus yazamuye imibare y’abandura n’abapfa ku isi. Mu Rwanda, muri uku kwezi gusa abanduye Covid-19 bashya barenze 1/3 cy’abanduye 14,166 bose hamwe kugeza ubu.
Naho abishwe n’iki cyorezo muri uku kwezi konyine barenze 1/2 cy’abo yishe 183 bose hamwe kuva yahagera, nk’uko biboneka mu mibare itangazwa na minisiteri y’ubuzima. Ku rutonde rw’ibihugu 98 byakozweho ubu bushakashatsi Brazil ya nyuma ifite amanota 4%, naho Leta zunze ubumwe za Amerika ya 94 ikagira 17%. Ibihugu nk’Ubushinwa, Tanzania, Burundi n’ibindi ntibiri kuri uru rutonde kuko “nta mibare bitanga” nk’uko iki kigo kibivuga.
