Guverinoma y’u Rwanda yemeje ko rwakiriye abimukira barindwi baturutse muri Amerika, mu rwego rw’amasezerano yo kwimura abantu bari muri Amerika mu buryo butemewe yasinywe hagati y’ibihugu byombi muri uyu mwaka.
Umuvugizi wa Guverinoma, Yolande Makolo yavuze ko: “Itsinda rya mbere ry’abimukira barindwi basuzumwe bageze mu Rwanda hagati muri Kanama.”
Yavuze ko abo bimukira bacumbikirwa n’umuryango mpuzamahanga kandi bagasurwa n’Umuryango Mpuzamahanga wita ku Bimukira (IOM) hamwe n’inzego z’imibereho myiza z’u Rwanda.
Makolo yavuze ko batatu muri abo bantu bagaragaje icyifuzo cyo gusubira mu bihugu byabo, mu gihe bane bifuza kuguma no kubaka ubuzima mu Rwanda. Ibihugu bakomokamo ntibyashyizwe ahagaragara.
Makolo yongeyeho ati: “Hatitawe ku byo bakeneye byihariye, abo bantu bose bazahabwa inkunga ikwiye no kurindwa na Guverinoma y’u Rwanda.”
Nyuma y’icyifuzo cya Washington, u Rwanda rwemeye kwakira abimukira bagera kuri 250 bazaturuka muri Amerika.
Muri ayo masezerano, u Rwanda rufite ubushobozi bwo kwemera cyangwa kwanga buri muntu ku giti cye mu basabiwe kwimurwa kandi abemerewe bazahabwa amahugurwa y’abakozi, ubuvuzi, n’inkunga y’amacumbi.
