Leta y’u Rwanda, ku bufatanye n’Ubwami bwa Hashemite bwa Jorodaniya, muri iki cyumweru bohereje imfashanyo igenewe abaturage bo muri Gaza.
Iyo mfashanyo igizwe n’ibiribwa n’ibikoresho by’ubuvuzi bifite uburemere burenga toni 40. Iki ni igice cy’umusanzu w’u Rwanda mu bikorwa mpuzamahanga byo gutabara abarimo gukubitwa n’ibibazo by’intambara n’amakuba.
Iyi mfashanyo yakiriwe i Amman n’umuryango Jordan Hashemite Charity Organization, uzayigeza ku bo igenewe.
Ni ubwa kabiri u Rwanda rwohereje imfashanyo nk’iyi muri iyi ntara yibasiwe n’intambara, mu rwego rwo kugaragaza ubufatanye n’ubumuntu ku rwego mpuzamahanga.
