Inteko y’Abashinjacyaha yasabye urukiko rukuru, urugereko rwihariye ruburanisha ibyaha by’iterabwoba n’ibyambukiranya imbibi ko urubanza rwa Paul Rusesabagina n’abandi 20 rwasubikwa rugasubukurwa kuri uyu wa 12 Werurwe 2021, kubera ko we n’abandi bamwe muri bo batunganiwe.
Urubanza rwasubukuwe kuri uyu wa 11 Werurwe 2021 nyuma y’aho ejo hashize urukiko rwa rwatesheje agaciro inzitizi ya Rusesabagina y’uko yageje mu Rwanda tariki ya 26 Kanama 2020 ashimuswe, yashingiragaho asaba kurekurwa.
Ubushinjacyaha buvuga ko mu nyungu z’ubutabera, urubanza rukwiye gusubikwa kuko abaregwa bose hari ibyaha bahuriyeho. Buti: “Urubanza rurimo abantu benshi ariko ibivugwa bifite aho bihurira. Ku bw’ubutabera buciye mu mucyo, kuba hari ababa batunganiwe kandi mu gihe bazagera igihe cyo kubivugaho, urukiko rwashyira mu gaciro hakareba niba hatategekwa Me Ryudakemwa kwitabira iburanisha ry’ejo, rukaba rwagira ibihano rumufatira.”
Me Rudakemwa Jean Felix ni umwe mu banyamategeko babiri bunganira Paul Rusesabagina, bikaba byari byitezwe ko yitabira uru rubanza ndetse ngo yari yabimenyesherejwe ku rubuga rwa ‘email’ ababuranyi bahuriraho. Ngo “ntiyigeze amenyesha urukiko ko ataboneka.”
Ku ruhande rw’abaregwa, Me Nkundabarashi Moise wunganira Nsabimana Callixte (Major Sankara) we yifuje ko urubanza rukomeza kuko ngo kuba uwunganira Paul Rusesabagina atabonetse kandi babyumvikanyeho “byafatwa nko kwiyima uburenganzira bwo kunganirwa, bikaba bidakwiye kubangamira abareganwa na we.”
Muri uru rubanza, byagaragaye hari abandi batatu bareganwa na Rusesabagina batari bafite ababunganira.
Urukiko rusanze urubanza rugomba gusubikwa kugira ngo hubahirizwe uburenganzira bw’abaregwa bwo kunganirwa, rutegetse ko ruzakomeza ejo tariki ya 12 Werurwe 2021 kandi abunganizi b’abaregwa bose bakaba bagomba kuba bahari.
Kurikira ibiganiro n’amavidewo binyura kuri Bwiza TV
