Urwego rw’igihugu rushinzwe imiyoborere, RGB, rwatangaje ko ubwisanzure bw’itangazamakuru mu Rwanda bugeze ku kigero cya 93.7%, ubwisanzure bwo kuvuga bwo bukaba bugeze kuri 86.4%.
Ibi bigaragara muri raporo ya Media Barometer igaragaza uko itangazamakuru rihagaze
mu Rwanda, uru rwego rusohoye ku nshuro ya kane.
Iyi raporo ishingiye ku bipimo bitanu birimo: kubahiriza amategeko n’amahame ngengamyitwarire biri ku kigero cya 91%, ubwiyongere n’ubwinshi bw’ibitangazamakuru bugeze kuri 87.3%, uruhare rw’itangazamakuru mu guteza imbere demukarasi n’imiyoborere myiza bigeze kuri 85%, iterambere ry’itangazamakuru n’ubunyamwuga biri kuri 62.4%, no kugera ku makuru bigeze kuri 77.8%.
Ibipimo bito birimo: ubwisanzure bw’itangazamakuru buri kuri 93.7%, ubwisanzure bwo kuvuga bugeze kuri 86.4%, uburenganzira bwo kubona amakuru bugeze kuri 94.7%, ubwigenge mu gutunganya inkuru bugeze kuri 87% hamwe n’iyubahirizwa ry’uburenganzira bwo kurengera umunyamakuru rigeze kuri 93.3%.
Hashingiwe ku byo iyi raporo yerekana, biragaragara ko hari intambwe yatewe mu myaka itatu ishize. Mu 2018, bwari ku kigero cya 81.3%. Gusa amahitamo y’abaturage agaragaza ko iyubahiriza ry’ubwisanzure bw’itangazamakuru rigeze ubu buri ku kigero cya 70.1%.
