Ubwoko bwa Coronavirus bwavumbuwe muri Afurika y’Epfo bushobora gufata uwahawe urukingo rwa Pfizer-BioNTech ku rugero runaka, nk’uko ubushakashatsi bwakozwe muri Israel bwabyerekanye.
Ubu bushakashatsi buvuga ko ubwoko bwa coronavirus yo muri Afurika y’Epfo bwashoboye kwinjira mu burinzi butangwa na doze ebyiri z’urukingo rwa Pfizer-BioNTech ku rugero runaka, nubwo bitarasobanuka neza ubushobozi bwo kurinda butakara.
Ubushakashatsi bwashyizwe ahagaragara ku wa Gatandatu, bwagereranije abantu bagera kuri 400 basanzwemo COVID-19 ibyumweru bibiri cyangwa birenga nyuma yo guhabwa doze imwe cyangwa ebyiri z’urukingo, n’abarwayi bangana gutya batakingiwe bafite iyi ndwara.Bwahuje imyaka n’igitsina, n’ibindi.
Ubushakashatsi bwakozwe na kaminuza ya Tel Aviv hamwe n’ikigo kinini gitanga serivisi z’ubuvuzi muri Israel, Clalit, bwerekana ko ubwoko bwa coronavirus bwo muri Afurika yepfo, B.1.351, bwasanzwe bugera kuri 1 ku ijana by’abantu bose bafite COVID-19 mu bantu bakoreweho ubushakashatsi.
Ariko mu barwayi bari barabonye doze ebyiri z’urukingo, umubare w’abantu banduye wari wikubye inshuro umunani ugereranije n’abatarakingiwe, 5.4 ku ijana kuri 0.7 ku ijana nk’uko iyi nkuru dukesha Al Jazeera ikomeza ivuga.
Abashakashatsi bavuze ko ibi byerekana ko uru rukingo rudakora neza mu kurwanya ubwo bwa Covid-19 bwabonetse muri Afurika y’Epfo, ugereranije na coronavirus y’umwimerere ndetse n’ubundi bwoko bwagaragaye bwa mbere mu Bwongereza.
Adi Stern wo muri Kaminuza ya Tel Aviv wayoboye ubu bushakashatsi ati: “Twabonye igipimo kiri hejuru cyane cy’ubwoko bwo muri Afurika y’Epfo mu bantu bakingiwe na doze ya kabiri, ugereranije n’itsinda ritakingiwe. Ibi bivuze ko ubwoko bwo muri Afurika y’Epfo bushobora, mu rugero runaka, gucengera uburinzi bw’urukingo. ”
Icyakora, abashakashatsi bibukije ko ubushakashatsi bwafashe gusa urugero ruto rw’abantu banduye ubwoko bwo muri Afurika y’Epfo kubera ko ari bakeya muri Israel.
Bavuze kandi ko ubushakashatsi butagamije kugaragaza ubushobozi bucye bw’urukingo ku buryo ubwo ari bwo bwose, kubera ko bwarebaga gusa abantu basanzwemo virusi ya COVID-19, atari ku kigero rusange cy’ubwandu.
Pfizer-BioNTech ntiyabashije guhita iboneka kugirango itange ibisobanuro, gusa ku itariki ya 1 Mata yavuze ko urukingo rwayo rufite ubushobozi bugera kuri 91% bwo gukumira COVID-19, hashingiwe ku mibare ivuguruye.
Kurikira ibiganiro n’amavidewo binyura kuri Bwiza TV
