Igice cya mbere cya Shampiyona y’u Rwanda “2024/25 Rwanda Premier League” cyasojwe ku Cyumweru tariki ya 12 Mutarama 2025 Rayon Sports iyoboye urutonde n’amanota 36 mu mikino 15.
Ni igice cyaranzwe n’umupira mwiza n’ibitego byiza ariko hanagaragayemo ibyatunguye benshi ndetse n’amakimbirane yateje impaka.
Dore ibintu bine by’ingenzi byaranze iki gice cya mbere:
1. Isezererwa rya Haruna Niyonzima
Haruna Niyonzima wigeze kuba kapiteni w’ikipe y’igihugu Amavubi yagarutse muri Rayon Sports gusa ntiyahamaze kabiri kuko atigeze akina umukino n’umwe wa shampiyona uretse umukino umwe bakinnye na Azam FC.
Nyuma y’iminsi 50 gusa, Haruna yasheshe amasezerano n’ikipe kubera kutishyurwa amafaranga y’inyongera yari yemerewe angana na miliyoni eshanu z’amafaranga y’u Rwanda.
Ibi byabaye igisebo gikomeye ku ikipe ya Rayon Sports ndetse byagaragaye nk’igihombo ku isura y’iyi kipe ikomeye.
2. APR yatewe mpaga
Ishyirahamwe ry’umupira w’amaguru mu Rwanda (FERWAFA) ryari ryashyizeho itegeko rishyiraho umubare ntarengwa w’abakinnyi b’abanyamahanga mu kibuga aho buri kipe itagombaga gukinisha abarenga batandatu.
Gusa ubwo APR FC yanganyaga na Gorilla FC ku wa 3 Ugushyingo 2024 yari yakinishije umukinnyi wa karindwi w’umunyamahanga, Nwobodo Chidiebere wasimbuye Tuyisenge Arsène.
Icyo gihe Gorilla FC yahise itanga ikirego maze FERWAFA ifata icyemezo cyo gutera APR FC mpaga.
Ibi byateye impaka ndende ku mikorere y’amakipe n’umwihariko wa APR FC mu ishyirwa mu bikorwa ry’amategeko.
3. Rayon Sports na APR FC batsindiwe i Huye
Akarere ka Huye kazahora kibuka icyumweru cya 15 cya shampiyona aho amakipe yombi akomeye mu Rwanda, Rayon Sports na APR FC, yatsindiwe i Huye.
Mukura Victory Sports yatsinze Rayon Sports ibitego 2-1 tariki ya 11 Mutarama 2025, ikuraho agahigo k’imikino 14 iyi kipe yari imaze idatsindwa. Bukeye bwaho, Amagaju FC atsinda APR FC igitego 1-0 nabwo i Huye.
Gutsindwa kw’aya makipe abiri ku munsi umwe byabaye amateka kuko bidakunze kugaragara muri shampiyona y’u Rwanda.
4. Stade Amahoro yuzuye mbere y’umukino wa Rayon Sports na APR
Umukino w’amateka hagati ya Rayon Sports na APR FC wabereye kuri Stade Amahoro tariki ya 7 Ukuboza 2024. Ni umukino wa mbere wa shampiyona waberaga kuri iyi stade ivuguruye kuva imirimo yo kuyisana yarangira muri Kamena 2024.
Mbere y’umunsi w’umukino, amatike yari yamaze gushira aho stade ifite imyanya 45,000 yari yamaze kuzura. Uyu mukino wakurikiranywe n’abafana benshi cyane winjiza amafaranga angana na miliyoni 173.5 z’amafaranga y’u Rwanda.
