Ishyaka Forum for Democratic Change ribarizwamo Dr Kiiza Besigye, ryatangaje ko rikekaho Guverinoma ya Uganda kugurisha zimwe mu mpirimbanyi zaryo zirimo Sam Mugumya kubw’umutwe wa M23 kuri Repubulika iharanira Demokarasi ya Congo.
Mugumya yafatiwe muri Repubulika iharanira Demokarasi ya Congo mu 2014, ashinjwa ibyaha bifitanye isano no guhungabanya umutekano. Umuvugizi w’ingabo za Uganda, Col. Paddy Ankunda icyo gihe akaba yaravuze ko Mugumya yasanganywe n’abandi bantu 4 bafite akayabo k’Amadolari n’inyandiko zibashinja gukorana n’umutwe w’inyeshyamba mu burasirazuba bwa Congo, bafite imigambi yo guhirika ubutegetsi bwa Uganda.
Ishyaka FDC ritavuga rumwe n’ubutegetsi muri Uganda rikaba ngo ryizera ko guverinoma yagiranye na Guverinoma ya Congo amasezerano yo gucyura inyeshyamba za M23 ziri muri Uganda, Congo nayo igashakira ibirego bikaze aba bayoboke ba FDC.
Mu kwezi gushize nk’uko iyi nkuru dukesha Chimpreports ikomeza ivuga, Mugumya n’abandi Bagande bari mu itsinda ry’abantu bagera muri 200 bagomba kuburanishwa bakurikiranweho kuba mu mutwe wa ADF.
Ubwo yagiranaga ikiganiro n’abanyamakuru kuri uyu wa Gatanu ku cyicaro cy’ishyaka ahitwa Najjanankumbi, Harold Kaija, Umunyamabanga Mukuru Wungirije wa FDC, yavuze ko bakeka ko inama iherutse kuba hagati ya Museveni na mugenzi we wa Congo, Joseph Kabila yari igamije gushyira amasezerano yavuzwe mu bikorwa.
Uyu muyobozi yavuze ko Mugumya wari ufungiwe muri Gereza ya Gisirikare ya Ndolo yoherejwe I Beni kuburanishwa nyuma y’umubonano wa Museveni na Kabila I Kasese aho bivugwa ko Museveni yemeye gutanga abarwanyi ba M23.
Yakomeje avuga ko amakuru abageraho ababwira ko guverinoma ya Congo yasanze nta birego bikomeye yashinja Mugumya na bagenzi be igafata icyemezo cyo kubashyira mu kebo kamwe n’abarwanyi ba ADF.
Iri shyaka ryatangaje ko ridashobora kohereza abanyamategeko bo guhagararira abayoboke baryo mu rubanza kubera uko system y’ubutabera yubatse muri Congo gutandukanye no muri Uganda, ariko ngo bashatse abanyamategeko b’Abakongomani bazabunganira mu Rukiko rwa Beni.
Ubu buyobozi bukaba buvuga ko buteganya muri iki cyumweru kiza kwegera ambasade ya Congo muri Uganda bakayimenyesha impungenge zabo kuri iki kibazo.
Sam Mugumya na bagenzi be bane, Aggrey Kamukama, Steven Mugisha, Nathan Bright na Joseph Kamugisha bafatiwe muri Congo mu 2014 mbere yo gufungwa, ariko nk’uko bitangazwa n’abayobozi ba FDC, ngo bafatiwe ku mupaka bahunga ihohoterwa bakorerwaga muri Uganda kubera politiki.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
