Inzego zishinzwe umutekano muri Uganda, zataye muri yombi umugabo ukekwaho gushaka kugaba igitero cy’ubwiyahuzi mu muhango wo gushyingura Maj Gen Paul Lokech wahoze ari Umuyobozi Mukuru Wungirije wa Polisi ya kiriya gihugu.
Umuvugizi w’Igisirikare cya Uganda, Brig Flavia Byekwaso mu itangazo yasohoye, yavuze uwafashwe agambiriye guhungabanya ishyingura rya Gen Lokech ari uwitwa Katumba Abdul uzwi nka Ben.
Brig Byekwaso yavuze ko uyu mugabo “yafashwe ku bufatanye n’inzego zishinzwe umutekano ahazwi nka Mikicha Guest House, ku muhanda wa Canigula mu mujyi wa Pader.”
Katumba Abdul ngo yafashwe nyuma y’amakuru yatanzwe n’Urwego rwa Uganda Rushinzwe Ubutasi bwa Gisirikare (CMI).
Mu byo yafatanwe harimo ibisasu biciriritse, ibikapu bitwarwamo ibisasu, ibizwi nka Ball bearing, amakoti akoreshwa mu bwiyahuzi, insinga, udukoresho tuzwi nka detonators duturitsa ibisasu, terefoni zituritsa ibisasu, insinga, turunovisi, imigozi ya terefoni, n’ibindi.
Brig Byekwaso yavuze ko “Iperereza ryagaragaje ko ukekwa yari agambiriye guhungabanya imihango yo gushyingura nyakwigedera Maj Gen Paul Lokech.”
Ni Lokech wapfuye mu mpera z’icyumweru gishize azize urupfu rutunguranye, mbere yo gushyingurwa ku gisekuru cye mu karere ka Pader avukamo ku gicamunsi cyo kuri uyu wa Gatanu.
Brig Byekwaso yavuze ko abandi bakekwaho kuba muri uriya mugambi ari benshi, gusa bakaba bamenyekanye ku buryo inzego z’umutekano zatangiye igikorwa cyo kubahiga.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
