Perezida wa Uganda, Yoweri Museveni kuri uyu wa 8 Kamena 2021 yashyizeho Visi Perezida, Minisitiri w’Intebe n’abagize guverinoma, aho bigaragara ko abarimo umufasha we Janet Museveni usanzwe ari Minisitiri w’Uburezi yagumyemo, abarimo Sam Kutesa wari Minisitiri w’Ububanyi n’Amahanga basimbujwe.
Uwo yagize Visi Perezida ni Rtd Maj. Jessica Alupo, Minisitiri w’Intebe ni Nobinah Nabbanja, ba Minisitiri b’Intebe bungirije ni batatu barimo Hon. Rebecca Kadaga ushinzwe umuryango wa Afurika y’Iburasirazuba (EAC).
Imbere muri Guverinoma, Janet Museveni Kataaha aracyari Minisitiri w’Uburezi, Gen. Katumba Wamala aracyari Minisitiri w’Umurimo n’Ubwikorezi, Dr Jane Ruth Aceng na we aracyari Minisitiri w’Ubuzima.
Hon. Frank Tumwebaze yagizwe Minisitiri w’Ubuhinzi n’Ubworozi, Hon. Vincent Ssempijja agirwa Minisitiri w’Ingabo n’abademobe, Hon. Ruth Nankabirwa ni Minisitiri w’Ingufu n’ubucukuzi bw’amabuye y’agaciro, Matia Kasaija ni Minisitiri w’Imari n’Igenamigambi, Jeje Odongo ni Minisitiri w’Ububanyi n’Amahanga.
Minisitiri w’Intebe ni umwe, abamwungirije ni batatu, ba Minisitiri ni 27, Abanyamabanga ba Leta muri Minisiteri zitandukanye ni 50.
