Perezida Yoweri Kaguta Museveni wa Uganda yoroheje ingamba zo kwirinda COVID-19 zari zimaze iminsi 42 mu gihugu cye, nyuma y’uko imibare y’abandura n’abahitanwa n’iki cyorezo igabanutse mu buryo bugaragara.
Perezida Museveni yoroheje ziriya ngamba nyuma y’igitutu Leta ya Uganda yari yatangiye gushyirwaho n’abaturage bayisaba gukuraho zimwe mu ngamba zirimo na gahunda ya Guma mu Rugo.
Nk’i Kampala mu murwa mukuru abaturage bari barahiriye gukora urugendo rwerekeza ku ngoro y’Umukuru w’Igihugu mu buryo bwo kwigaragambya, bashinja Leta gufata umurongo mubi.
Museveni mu ijambo yagejeje ku banya-Uganda ku munsi w’ejo, yavuze ko kuba umubare w’abarwayi ba COVID-19 bari mu bitaro waragabanutse cyane ukava ku barenga 1,000 ukagera ku bantu 600 byaratewe no gushyiraho Guma mu Rugo.
Yasubiyemo amagambo ya Minisiteri y’Ubuzima muri Uganda avuga ko “impuzandego y’ubwandu yaragabanutse iva ku kigero cya 22% igera ku 8%.”
Cyakora cyo Museveni yavuze ko abahitanwa na kiriya cyorezo muri Uganda bakiri benshi bitewe n’abo yise “abahanuzi b’ibinyoma”, aganisha ku batavuga rumwe n’ubutegetsi bwe.
Ingamba Perezida Museveni yoroheje zirimo imodoka zitwara abantu mu buryo bwa rusange zemerewe gusubukura ingendo, ariko zigatwara abagenzi batarenze 50% by’ubushobozi bwazo.
Amapikipiki na yo yemerewe kongera gutwara abagenzi, ariko ntarenze umuntu umwe.
Abafite imodoka zabo bwite na bo bemerewe kongera gukora ingendo, ariko bagatwara abantu bake bashoboka.
Ni ingamba Perezida Museveni yavuze ko zizongera gusuzumwa nyuma y’ibyumweru bibiri.
Ibikorwa bihuriza hamwe abantu benshi nk’amashuri, insengero, utubari, n’inzu zikorerwamo siporo byo bizakomeza gufunga nk’uko Museveni yabitangaje.
Uganda kuri ubu irabarura abamaze kwandura COVID-19 bakabakaba ibihumbi 94, barimo abamaze guhitanwa na yo 2,661.
