Kuri uyu wa Kabiri, itariki 12 Gicurasi 2026, Perezida w’u Burundi, Évariste Ndayishimiye yashimye impinduka zakozwe mu bukungu bwa Uganda ndetse n’uruhare rwa Perezida Yoweri Museveni mu kwimakaza amahoro mu karere, mu gihe Museveni yakoresheje umuhango we wo kurahira ahamagarira Abagande “gukanguka bakava mu bitotsi” bakibanda ku kongera umutungo wabo.
Mu ijambo yagejeje ku banyacyubahiro bari mu birori byo kurahira kwa Perezida Museveni byabereye kuri Kololo Ceremonial Grounds, Ndayishimiye yavuze ko Museveni ari “umuyobozi w’icyerekezo” n’a mukuru wabo mu buyobozi” kandi ubuyobozi bwe bwafashije gushyira Uganda mu bukungu bwa Afurika bugenda buzamuka.
Ndayishimiye yagize ati: “Uganda yagiye ihagarara mu bihugu byifashe neza cyane ku mugabane mu bukungu.”
Umuyobozi w’u Burundi kandi yashimye uruhare rwa Museveni mu bikorwa byo kugarura amahoro n’umutekano mu Burundi mu bihe by’amakimbirane ya politiki, avuga ko Uganda yagize uruhare rukomeye mu gushyigikira ibiganiro n’ubwiyunge.
Perezida Ndayishimiye yagize ati: “Abaturage b’u Burundi bazahora bibuka bashimira imbaraga zanyu zidacogora kandi dushyigikire amahoro, atari ku mipaka yacu gusa, ahubwo no mu karere kose.”
Yongeyeho ko Museveni yakomeje kubahwa cyane mu Karere k’Ibiyaga Bigari kubera inama yatanze ku bijyanye no kwishyira hamwe kw’akarere, ubumwe n’ubufatanye mu by’umutekano.
Ndayishimiye kandi yashimye Abagande kuba barongereye indi manda (ya 7) Perezida Museveni, avuga ko amajwi yabonye agaragaza icyifuzo cy’abaturage bifuza “amahoro, umutekano, n’ubuyobozi bw’ubwenge.”
Ku ruhande rwe Museveni yakoresheje ijambo rye mu irahira mu guhamagarira Abagande kongera umusaruro w’ubukungu kandi aburira abagikoresha ruswa muri guverinoma.
Museveni yagize ati: “Iterambere ritandukanye no kwihangira umutungo bwite.”
Yahamagariye abaturage kugira uruhare rugaragara mu bikorwa bibyara inyungu aho gushingira gusa kuri gahunda za leta.
