Ubutabera bwa Uganda kuri uyu wa Kane bwemereye perezida Museveni w’imyaka 73 kuzahatana mu matora y’umukuru w’igihugu ateganyijwe mu 2021 aho azaba agiye guhatanira manda ya gatandatu.
Muri Mutarama uyu mwaka, nibwo perezida Museveni yatangaje itegeko rikuraho imyaka 75 umukuru w’igihugu agomba kuba atarengeje ngo yemererwe guhatanira kuyobora Uganda, bituma abatavuga rumwe n’ubutegetsi bamushinja gushaka kugundira ubutegetsi ubuzima bwe bwose.
Ihuriro ry’amashyaka atavuga rumwe n’ubutegetsi rikaba ryarahise rigana urukiko rushinzwe kurengera itegeko nshinga ariko rukaba rwemeje bidasubirwaho ikurwaho ry’ingingo ivuga ku myaka umukuru w’igihugu agomba kuba atarengeje nk’uko Ibiro Ntaramakuru by’Abafaransa dukesha iyi nkuru bivuga.
Ibi bikaba byarabaye mu gihe perezida Museveni ngo agifata ubutegetsi mu 1986, yatangaje ko abategetsi bamara igihe kirekire ku butegetsi ari bo batera imivumo Afurika, ariko ubwo yiyamamazaga mu 2016 muri manda ya gatanu akaba yaravuze ko igihe cye cyo kuva ku butegetsi kitaragera.
