Ingengo y’imari u Rwanda ruzakoresha mu mwaka utaha wa 2021/2022 ni Miliyari 3, 807 Frw, iziyongera ku kigero cya 9,8% ugereranyije n’iyari yakoreshejwe mu mwaka uri kurangira kuko yo yari Miliyari 3,464.8 Frw.
Ibi bisobanuye ko Miliyari 342.2 Frw ari zo ziziyongera ku ngengo y’imari y’umwaka utaha.
Minisitiri w’Imari n’Igenamigambi, Uzziel Ndagijimana, aheruka gutangaza ko 67% by’ingengo y’imari y’igihugu (angana na Miliyari 2,543.3 Frw) akomoka mu mutungo w’imbere mu gihugu, ni ukuvuga mu misoro ahanini, mu gihe inkunga z’amahanga ari Miliyari 612.2 Frw bingana na 16% by’ingengo y’imari yose.
Ni mu gihe inguzanyo z’amahanga ari Miliyari 651.5 Frw bingana na 17%.
MINECOFIN iteganya ko Miliyari 1,872.7 Frw bingana na 49,2 % azakoreshwa mu ngengo y’imari isanzwe, ni ukuvuga mu bikorwa birimo nko kwishyura imishahara, kugura ibikoresho nkenerwa n’ibindi.
Azakoreshwa mu mishinga y’iterambere no mu ishoramari rya Leta azagera kuri Miliyari 1,934.2 Frw bingana na 50,8 % by’ingengo y’imari yose. Aha niho hari amafaranga yo gushyigikira ibikorwa by’abikorera mu guhangana n’ingaruka z’icyorezo cya COVID-19.
Minisiteri y’Imari n’Igenamigambi ni yo yihariye igice kinini cy’iriya ngengo y’imari, kuko iyi Minisiteri yagenewe arenga Miliyari 1,568.3Frw.
Iyi Minisiteri ikurikiwe n’iy’Ibikorwa Remezo (MININFRA) yagenewe arenga Miliyari 397.4 Frw; na ho iy’Ubuzima (MINISANTE) igenerwa arenga Miliyari 317.5 Frw.
Minisiteri y’Uburezi (MINEDUC) yo yagenewe ingengo y’imari y’arenga Miliyari 180.5 Frw, iy’Ingabo (MINADEF) igenerwa arenga Miliyari 166.7 Frw, Ibiro by’Umukuru w’Igihugu n’Ikigo cy’Igihugu (RDB) bagenerwa arenga Miliyari 118.3 Frw mu gihe Minisiteri y’Ubuhinzi n’Ubworozi (MINAGRI) yagenewe arenga Miliyari 114.1 Frw.
Minisiteri y’Ubutegetsi bw’Igihugu (MINALOC) yagenewe ingengo y’imari ya Miliyari 109.4 Frw atareba uturere, iy’Ubutabera (MINIJUST) igenerwa miliyari 106.7 Frw na ho iy’Ububanyi n’amahanga (MINAFFET) igenerwa angana na Miliyari 41.2 Frw.
Za Minisiteri n’Ibigo byagenewe ingengo y’imari nto kurusha ibindi harimo Minisiteri y’Urubyiruko, Umuco na Siporo (MYCULTURE) yagenewe arenga Miliyari 6.47 Frw, Ubushinjacyaha bw’u Rwanda bwagenewe Miliyari 6.4 Frw na Minisiteri ya Siporo (MINISPORTS) yagenewe Miliyari 3.2 Frw.
