Umugaba Mukuru w’ingabo za Repubulika ya Demukarasi ya Congo (FARDC), Lt Gen. Christian Tshiwewe, yihanangirije abasirikare bakoresha imbuga nkoranyambaga bari ku rugamba.
Ni mu gihe yasozaga uruzinduko rwo kugenzura ibikorwa bya FARDC byo kurwanya imitwe yitwaje intwaro ikorera mu ntara ya Kivu y’Amajyaruguru, by’umwihariko M23, kuri uyu wa 12 Mutarama 2023.
Lt Gen. Tshiwewe yabwiye abasirikare ko yabonye kenshi bamwe muri bo bakoresha telefone bari ku rugamba, bagafata amafoto n’amashusho, bakayashyira ku mbuga nkoranyambaga. Ati: “Tubona inshuro nyinshi bamwe mu basirikare bari ku rugamba bafite telefone. Bafata amashusho n’amafoto, bakayashyira kuri WhatsApp na Facebook.”
Yategetse aba basirikare kutongera gukoresha telefone mu gihe bari mu bikorwa by’igisirikare. Ati: “Nta musirikare wemerewe gukoresha telefone mu gihe cya za operasiyo.”
Uruzinduko rwa Lt Gen. Tshiwewe rwatangiye tariki ya 10 Mutarama. Ni urwa mbere yari agiriye mu burasirazuba bw’igihugu kuva yaba Umugaba Mukuru w’ingabo za RDC mu Kwakira 2022.
