Minisiteri y’Ubuzima mu gihugu cya Kenya, yatangaje ko umuntu wa mbere muri iki gihugu yitabye Imana kuri uyu wa 26 Werurwe azize Icyorezo cya Virusi ya Corona. Itangazo iyi Minisiteri yasohoye rivuga ko uwitabye Imana ari ” umugabo w’umunya-Kenya ufite imyaka 66 y’amavuko wari urwariye mu bitaro bya Agha khan.” Iyi Minisiteri yavuze ko uwitabye Imana yari arwaye Diyabete, akaba yarageze muri Kenya ku wa 13 Werurwe avuye muri Afurika y’Epfo, ariko yabanje kunyura muri Swaziland. Uriya Munya-Kenya yabaye umuntu wa mbere muri Afurika y’Iburasirazuba wishwe na Coronavirus. Magingo aya, Kenya iza ku mwanya wa kabiri muri bihugu bya Afurika y’Iburasirazuba bifite abarwayi benshi ba Coronavirus nyuma y’u Rwanda. Muri iki gihugu habarurwaga abantu 31 banduye kiriya cyorezo, mu gihe mu Rwanda habarurwa 50.
