Mukiza Willy Maurice ni umuhungu wa Gen. Maj. Ntawunguka Pacifique, umuyobozi wa FDLR uzwi nka Gen. Omega. Uyu munsi tariki ya 19 Ukuboza 2019 yateranye n’urundi rubyiruko ruri muri Intare Arena mu nama y’Umushyikirano ibaye ku nshuro ya 17.
Mukiza yavuze ko ko we n’umuryango we bicara bakaganira, ntibumve ukuntu leta y’u Rwanda ibitaho. Avuga ko ari mu banyeshuri barangije ikiciro cya Kabiri cya Kaminuza muri Kaminuza y’ u Rwanda, ishami rya Nyarugenge.
Ngo si we gusa wigiye ku nkunga ya leta kuko hari n’abandi bavandimwe be biga mu mahanga; mukuru we akaba yiga muri Canada, mushiki we akaba yiga muri Ghana.
Mukiza ati: “N’ubwo Data ari mu mashyamba ya Congo, ntimwadutereranye, mwatwitayeho, mwaduhaye amashuri, mwatwitwayeho nk’uko mwita ku bandi Banyarwanda bose.”
Mukiza yanzuye ubutumwa bwe asaba se kuva mu mashyamba, agataha mu Rwanda.
“Ndasaba data gutahuka, akaza mu Rwanda, aho abana be tumeze neza kandi tukaba tubona amahirwe nk’ay’abandi banyarwanda bose.” Mukiza.
Gen. Omega yabaye umuyobozi wa FDLR tariki ya 20 Nzeri 2019 asimbuye Gen. Sylvestre Mudacumura wishwe arashwe n’ingabo za Repubulika Iharanira Demukarasi ya Congo tariki ya 17 Nzeri.
