Umutaliyani Carlo Ancelotti watozaga ikipe ya Everton yo mu Bwongereza, ni we ugomba gusimbura Umufaransa Zinedine Zidane nk’umutoza wa Real Madrid.
Mu mpera z’icyumweru gishize ni bwo umutoza Zidane yatandukanye na Real Madrid, mbere y’uko iyi kipe isigara ishakisha umusimbura we.
Mu mazina yavugwaga harimo Raùl Gonzalez Blanco, Xabi Alonso na Antonio Conte uheruka gutandukana na Inter Milan yo mu Butaliyani.
Umunyamakuru José Félix Diás w’ikinyamakuru Marca, yatangaje ko Ancelotti ari we ugomba gusimbura Zinedine Zidane muri Real Madrid.
Uyu munyamakuru yavuze ko mu gihe cya vuba Ancelotti na Everton bagera ku masezerano yo gutandukana mbere y’uko Real Madrid iri kuvugana na Everton imutangaza nk’umutoza wayo mushya ku mugaragaro.
Si ubwa mbere Carlo Ancelotti agiye gutoza Real Madrid kuko yayitoje hagati ya 2013 na 2015, ayihesha ibikombe bitandukanye birimo UEFA Champions league ya 2014 yatwaye nyuma yo kunyagira Atletico de Madrid ibitego 4-1 ku mukino wa nyuma.
Uretse Real Madrid na Everton, Carlo Ancelotti yatoje andi makipe akomeye nka AC Milan batwaranye UEFA Champions league ebyiri, Chelsea, Bayern Munich na Paris Saint-Germain.
