Umutoza wa Manchester United, Ole Gunnar Solskjaer, umaze iminsi mike asimbuye Jose Mourinho wirukanwe ku wa Kabiri w’iki cyumweru, ku mukino wa Mbere ayoboye nk’umutoza w’iyi kipe, yawitwayemo neza abasha gutahana intsinzi y’ibitego bitanu.
Ni mu mukino wabaye kuri uyu wa Gatandatu tariki ya 22 Ukuboza 2018, aho ikipe ya Man. Utd yanyagiraga iya Cardiff ibitego bitanu kuri kimwe (5-1).
Nk’uko ibinyamakuru bitandukanye byagiye bibitangaza, ngo iyi ntsinzi idasanzwe uyu munya-Norvege atangiranye, yaherukaga hanze ya Old Trafford mbere ya 2013, umutoza Alex Ferguson atarayisezeramo.
Umukinnyi w’Umufaransa Paul Pogba utari ubanye neza n’umutoza Mourinho ndetse rimwe na rimwe akabanza ku gatebe k’abasimbura, yagaragaje ishyaka mu ikipe nyuma yo gusezerera umutoza butahuzaga.
Pogba yagize uruhare mu bitego hafi ya byose byatsinzwe, kuva ku cyinjijwe na Rashford ku munota wa 3, Ander Harrera ku munota wa 29, Anthony martial ku munota wa 41 na Jesse Lingard ku munota wa 90.
Ubu amahirwe ya Manchester United akaba arimo kugenda yiyongera mu gihe amwe mu makipe ayiri imbere nka Manchester City yatsinzwe na Crystal Palace, Chelsea igatsindwa na Leicester. Man Utd ikaba iri ku mwanya wa Gatandatu n’amanota 29, mu gihe Man City iyoboye urutonde ifite 48.
