Umuyobozi ukomeye yavuze ko Imana yamweretse ko Perezida Nkurunziza azakomeza kuyobora Abarundi

Umusenateri mu gihugu cy’u Burundi, Priscille Mwidogo unabarizwa mu ishyaka CNDD-FDD, yavuze ko Perezida Nkurunziza yashyizweho n’Imana kugira ngo azakomeza kayobora Abarundi.

Senateri Priscille Mwidogo yabitangaje ku wa Gatanu w’Icyumweru gishize mu nama yahuje abayobozi b’ibihugu bigize umuryango w’ibihugu byo mu karere k’ibiyaga bigari (ICGLR), aho yemeje ko ari Imana yamushyizeho atagomba kuvaho.

Yagize ati “Pierre Nkurunziza azanywanisha abarundi, niwe uzagarura abarundi mu ituze abifashijwemo n’Imana”.

Ibiro bikuru by’itangazamakuru mu Burundi bitangaza ko ubwo yari imbere y’imbaga y’abayobozi bagize uyu muryango, yavuze ko ‘Imana yamutumye kubwira bose ko Nkurunziza ariwe uzakomeza kuyobora u Burundi’.

Ni we muyobozi wa mbere ubarizwa mu ishyaka CNDD-FDD utangaje ko Nkurunziza yakomeza kuyobora u Burundi mu gihe we yitangarije ko mu matora y’umukuru w’igihugu ateganijwe umwaka utaha ataziyamamaza.

Hon. Mwidogo avuga ko Nkurunziza ari we utegerejwe gufasha abato n’abakuru, by’umwihariko ko abamurwanya bakwiye kubihagarika ngo kuko bashobora gusanga barwana n’ukuboko kw’Imana batabizi.

Mu ntangiriro z’umwaka ushize umufasha wa Perezida, Denise Nkurunziza yavuze amagambo ajya gusa n’aya ya Hon Mwidogo, aho yavuze ko umugabo we (Petero Nkurunziza) yagiye ku butegetsi ashyizweho n’Imana, ko no kuvaho kwe bizaba ku bushake bwayo.

Yagize ati “Yacaguwe n’Imana, si abantu bamutoye, ni Imana yonyine ishobora kumuvana ku butegetsi, ….”.

N’ubwo uyu musenateri avuga ko umukuru w’igihugu cyabo azaguma ku buyobozi, Ku wa Kane tariki ya 7 Kamena 2018, Nibwo Perezida Nkurunziza yatangarije Abarundi n’amahanga ko yiteguye gushyigikira umukuru w’igihugu Abarundi bazitorera mu 2020, by’umwihariko ko we atazongera kwiyamamaza.

Yagize ati “ Niteguye neza n’umutima wanjye wose n’ubwenge bwanjye bwose kuzashyigikira umukuru w’igihugu cyacu tuzatora umwaka wa 2020,… ndagira ngo mbamenyeshe, Abarundi n’amahanga ko tutazivuguruza, manda yacu izarangira mu mwaka wa 2020”.

Perezida Nkurunziza yagiye ku buyobozi mu 2005, ubu akaba ayoboye manda ya Gatatu. Yavuze ko ataziyamamaza mu 2020, mu gihe abatavuga rumwe na Leta bemeza ko Itegeko Nshinga ryahinduwe kugira ngo aziyongeze izindi manda kugeza 2034.