Umuyobozi w’Akarere ka Kabale mu gihugu cya Uganda, Patrick Besigye Keihwa, akomeje kwibasirwa n’abaturage nyuma y’aho akubise umunyamakuru wa Voice of Kigezi witwa Julius Arinaitwe amuziza ko yatangaje inkuru imushinja ruswa.
Biravugwa ko kuri uyu wa Mbere ushize, itariki 25 Kamena saa 08:30 z’ijoro ari bwo, Besigye Keihwa yateye aho Voice of Kigezi ikorera akabaza Arinaitwe, undi yaza akamwakiriza inshyi.
Uyu muyobozi akaba yarashinjaga uyu munyamakuru kwinjira mu nama ya njyanama y’akarere yateranye kuwa Mbere, yarangiza akajyana inkuru y’ukuntu abagize njyanama y’akarere bashinjaga uyu muyobozi gufatanya n’uwahoze ari engeneer w’akarere, James Kiganda, mu kubangamira imishinga y’akarere.
Abagize njyanama bakaba barashinjije uyu muyobozi gufatanya na Kiganda mu gushaka kudasubiza amafaranga y’imishinga yakoreshejwe yari yategetswe kwishyura kubera ko itakozwe uko bikwiye.
Uyu engeneer Kiganda akaba yarashyizwe mu majwi nyuma yo gukoresha nabi miliyoni 80 z’amashilingi mu kwagura imihanda mu 2016.
Nyuma y’iyi nama, Keihwa nibwo yateye Voice of Kigezi asaba inkuru Arinaitwe yari yahaye ubwanditsi, asanze inkuru yamaze kuyitanga yahise amukubita urushyi asaba ubuyobozi bwa radio kumwirukana. Bikavugwa ko uyu muyobozi ari umunyamigabane muri company nyiri Voice of Kigezi.
Spyreports dukesha iyi nkuru ikavuga ko uyu muyobozi yanashinjije uyu munyamakuru kwakira ruswa yahawe n’abagize njyanama ngo yandike iyo nkuru.
Arinitwe avuga ko Keihwa yarakajwe n’inkuru yari yanditse ku nama njyanama y’akarere yari yateranye umuyobozi w’akarere agahatwa ibibazo ku ngamba yafatiye uyu wari engeneer w’akarere, James Kiganda.
Samuel Amanya, umwe mu banyamakuru babonye uko byagenze mugenzi we akubitwa, avuga ko Keihwa yatutse Arinaitwe mu magambo y’urukozasoni y’Urukiga, ndetse akamukubita inshyi inshuro nyinshi mbere yo kumukangisha kumwirukanisha.
