Ikipe ya Musanze FC yamaze gutangaza ko yasezereye abakinnyi batanu, nyuma yo gusoza amasezerano yabo.
Iyi kipe ibinyujije kuri Twitter yayo kuri uyu wa Gatandatu, yemeje ko yamaze gutandukana na Niyitegeka Idrissa wari usanzwe ari Kapiteni wayo cyo kimwe na myugariro Niyonkuru Vivien.
Aba bombi biyongera ku bandi bakinnyi batatu iyi kipe yemeje ko yasezereye ku munsi w’ejo, barimo Ndagijimana Ewing, Uzayisenga Maurice ‘Jay’ na Niyonsenga Ibrahim bita Kibonge.
Musanze FC yasezereye aba bakinnyi mu gihe iri mu makipe yitwaye neza mu mwaka w’imikino ushize.
Iyi kipe yo mu majyaruguru Shampiyona ya 2021/22 yayisoje iri ku mwanya wa gatandatu, umwiza yagize mu mateka yayo nk’uko byagenze no mu 2016/17.
