Urukiko rw’Ubujurire kuri uyu wa Gatanu, itariki 07 Gicurasi, rwashimangiye igihano cy’igifungo cya burundu Urukiko Rukuru, Urugereko ruburanisha ibyaha Mpuzamahanga n’Ibyambuka imbibi, rwahanishije Munyagishari Bernard mu 2017.
Uyu mugabo wari ukuriye ishyaka MRND mu cyahoze ari Perefegitura ya Gisenyi yahamijwe kugira uruhare rutaziguye mu gutegura umugambi wo kwica Abatutsi akanajya no mu bitero bitandukanye byabahigaga.
Urukiko rwavuze ko yitabiriye inama zacurirwagamo umugambi wo kwica Abatutsi agaha urubyiruko rw’Interahamwe amabwiriza yo kubica no gufata abagore ku ngufu, kandi ngo akajya i Kigali kubashakira ibikoresho byo kubicisha birimo imihoro, amagrenade n’ibindi.
Havuzwe ko yatwaraga Abatutsi bafatiwe ku mabariyeri akabajyana ahitwaga komine rouge ari naho bicirwaga, agatanga amabwiriza yo gucukura ibyobo byo kubashyiramo, ndetse akanashyiraho amatsinda y’abashoferi bagombaga kubamutwaza.
Muri 2017, Urukiko rwavuze ko rushingiye ku bukana bw’ibikorwa bya Munyagishari byari bigamije kwica no kurimbura Abatutsi n’uburemere by’ingaruka zabyo, bigize impurirane y’icyaha cya Jenoside n’icyaha cyo kwica nk’icyaha kibasiye inyokomuntu rwategetse ko afungwa burundu.
Munyagishari yafatiwe muri Repubulika Iharanira Demokarasi ya Congo muri Gicurasi 2011 ashyikirizwa Urukiko Mpuzamahanga Mpanabyaha rwashyiriweho u Rwanda ICTR, na rwo rwamwohereje kuburanishirizwa mu Rwanda muri Nyakanga 2013.
Kurikira ibiganiro n’amavidewo binyura kuri Bwiza TV
