Urukiko Rwisumbuye rwa Gasabo kuri uyu wa 12 Werurwe 2021 rwategetse ko umunyamakuru wa shene ya YouTube ya Ishema TV, Niyonsenga Dieudonné uzwi nka Cyuma Hassan arekurwa.
Ni nyuma yo gutesha agaciro ibyaha ubushinjacyaha bwamuregaga nk’uko tubikesha umunyamakuru wa Radiyo Ijwi rya Amerika, Eric Bagiruwubusa. Ibi byaha birimo: gukoresha inyandiko mpimbano, gushyamirana n’inzego z’umutekano n’icyo kwiyitiria umwuga adakora Ubushinjacyaha bwamuregaga.
Cyuma Hassan yatawe muri yombi ari kumwe n’umushoferi we tariki ya 15 Mata 2020 azira kurenga ku mabwiriza ya Guma mu Rugo agamije kurwanya ikwirakwira rya Covid-19.
Icyo gihe RIB yagize iti: “Uyu munsi RIB yafashe Niyonsenga Dieudonne alias Cyuma ufite TV Ishema ikorera kuri murandasi, hamwe n’umushoferi we Komezusenge Fidele kubera ko barenze ku mabwiriza ya Guma mu Rugo no kurwanya ikwirakwira rya Covid-19.”
Uretse gutabwa muri yombi azira kutubahiriza amabwiriza yo kwirinda Covid-19, Cyuma yari amaze iminsi akorera kuri YouTube ibiganiro birebana na politiki n’abanyapolitiki bo mu Rwanda, bigateza impaka.
Nyuma y’itegeko ry’urukiko, Cyuma Hassan yarekuwe.
Kurikira ibiganiro n’amavidewo binyura kuri Bwiza TV
