Urusengero rwa Paruwasi ya Karambi mu itorero rya EAR ruri mu karere ka Huye mu Ntara y’Amagepfo, rwari rumaze imyaka 40 rwubakwa, rwatashywe ku mugaragaro kuri uyu wa 29 Ukuboza 2019.
Uru rusengero rwiswe ‘Umusamariya Mwiza’ rwubatswe kuva mu 1979 kugeza muri uyu mwaka w’2019. Rwafunguwe ku bufatanye bw’ubuyobozi bw’akarere ka Huye na Diyoseze ya Kigeme iyi Paruwasi iherereyemo.
Nk’uko Umuyobozi w’Akarere ka Huye, Sebutege Ange yabitangarije ku rubuga rwa Twitter, isuku n’isukura no gufatanya kw’abakirisitu mu gukemura ibibazo bibangamiye imibereho myiza yabo ni cyo amatorero yiyemeje muri uyu muhango.
Meya Sebutege yasobanuriye Bwiza.com ko ubusanzwe uru rusengero rwakoreshwaga gusa rwahawe izina uyu munsi. Kuva mu 1979 rwagiye rukorerwaho ibikorwa by’ubwubatsi bitandukanye, bikaba ari bwo byarangira.
