Ubuyobozi bw’urwororero rw’inyamaswa (Zoo) rwa Oakland muri Leta Zunze Ubumwe za Amerika bwatangaje ko bwatangiye gahunda yo kuzikingira icyorezo cya Covid-19 mu rwego rw’ubushakashatsi.
Izi nkingo zakozwe n’abahanga mu gukora imiti y’inyamaswa bo mu kigo cya Zoetis, zemezwa n’ibiro bishinzwe ubuhinzi n’ubworozi, UDSA.
Inyamaswa zatangiye guhabwa inyamaswa zirimo: amadubu, intare zo mu misozi miremire, ibisamagwe; icyiciro cya kabiri cy’izizahabwa uru rukingo cyo kirimo: ingurube, inguge n’uducurama.
Dr Alex Herman wungirije umuyobozi ushinzwe serivisi z’ubuvuzi mu Zoo ya Oakland nk’uko tubikesha igitangazamakuru ABC News, yatangaje ko bari gukurikiza amabwiriza atandukanye yo kurinda izi nyamaswa icyorezo cya Covid-19, nk’ayahawe abantu.
Kuri we, kuba inyamaswa zabonye n’urukingo, bizabafasha kuzirinda iki cyorezo kurushaho. Yagize ati: “Twishimiye ko ubu dushoboye kurinda neza inyamaswa zacu dukoresheje uru rukingo, tukanashimira Zoetis kuba yararukoze, ikaruduha, hamwe n’izindi Zoo muri US.”
Dr Mike McFarland ushinzwe ishami ry’ubuvuzi muri Zoetis na we yishimiye intambwe iki kigo cyateye mu rwego rw’ubushakashatsi, akaba yizeye ko buzafasha izi nyamaswa kubona uburinzi. Ati: “Dutewe ishema n’ubu bushakashatsi burimo agashya…Gutanga inkingo bizafasha abavuzi b’inyamaswa muri zoo gukomeza kwita kuri izi nyamaswa, injangwe nini n’izindi nyamaswa borora, bigabanye ibyago by’uko zakwandura Covid-19.”
Zoetis isobanura ko yatekereje gukora izi nkingo ubwo yabonaga ko n’inyamaswa zakwandura iki cyorezo. Urugero ni urwo muri Hong Kong, ahabonetse imbwa yanduye mu mwaka ushize. Irateganya guha zoo izindi nkingo zibarirwa mu 11,000 mu gihe kiri imbere.
