USA: Video y’Umwirabura wakubitaga umupolisi washakaga kumufata yaciye ibintu

Video igaragaza abantu birukankaga bajya gutabara umupolisi w’umuzungu wari urimo gukubitwa n’umwirabura yageragezaga kwambika amapingu yaciye ibintu ku mbuga nkoranyambaga, aho bivugwa ko imaze kurebwa n’abantu basaga miliyoni 2.

Iyi video yashyizwe kuri twitter y’ukoresha @GrantB911, uri mu bashinze konti ya twitter yamamaye ya @Breking911 ku mugoroba wo kuri uyu wa Kabiri ushize.

Iyi video ye yashyizeho caption igira iti: “Ibi byafashe intera itunguranye.”

Ikinyamakuru Newsweek dukesha iyi nkuru kivuga ko hataramenyekana aho byabereye n’igihe amashusho yafatiwe, ariko byatangiye umupolisi agerageza guta muri yombi umugabo w’umwirabura mu muhanda.

Humvikanamo ijwi ry’uyu mugabo wendaga gufatwa agira ati: “Mugabo, ntaho mpuriye n’uyu mwanda!”

Ubwo yavugaga ibi umupolisi agerageza kumujyana ku modoka mu gihe na none hatazwi icyo uyu yaziraga.

Well this took an unexpected turn… pic.twitter.com/MRe6BgANhC

— GrantB911 (@GrantB911) September 8, 2020

Uwo mupolisi ahita agaragara agerageza kwambika amapingu uwo mugabo ku ngufu undi agerageza kumucika.

Nyuma yo kugundagurana gato, uyu mugabo yabashije kurambika umupolisi hasi atangira kumutera ibipfunsi mu isura.

Ubwo, abandi bagabo babiri babirebaga nabo basa nk’abirabura, bagaragara bakura uwo mugabo hejuru y’uwo mupolisi, hagahita haza abandi bantu benshi bakagerageza kumufata.

Ubwo abari batabaye nabo umwe muri bo agaragara ashyira hasi uwo mugabo wari umereye nabi umupolisi, mu gihe abandi bamuteraga imigeri n’ibipfunsi.
Uwo mupolisi nawe ahita aza akamwambika amapingu ariko bamumufashije.