Muri uku kwezi ntihazabaho imyitozo ihuriweho ya “Shared Accord 2025”, nk’uko Ishami ry’Ububanyi n’Amahanga n’Ubutwererane rya Afurika y’Epfo (DIRCO) ryamenyeshejwe na Ambasade ya Amerika i Pretoria, ko imyitozo ihuriweho y’ubutabazi hagati y’ibihugu byombi yari iteganyijwe uyu mwaka yahagaritswe.
Iki cyemezo mu buryo burambuye kigaragara mu nyandiko yo ku itariki ya 1 Kanama 2025, ya Ambasade ya Amerika, yemeje ko Minisiteri y’Ingabo za Amerika (DoD) yahagaritse imyitozo, yari iteganijwe kuva ku itariki ya 11 kugeza ku ya 22 Kanama 2025.
Iyi myitozo ihuriweho yari iteganijwe kubera muri Afurika y’Epfo, hibandwa ku gushyigikira amahoro, gutabara imbabare, hamwe ni kwitoza imirwanire, ibintu by’ibanze byagiye byibandwaho mu myitozo yabanje ya “Shared Accord”.
Ni myitozo bivugwa ko yabaye urubuga rukomeye rwo kongera imikoranire, gushimangira ubufatanye bw’ingabo, no kubaka ubushobozi bwo gutabara hagati y’Ingabo z’igihugu cya Afurika y’Epfo (SANDF) n’Ingabo za Amerika nk’uko tubikesha urubuga military.africa.
Imyitozo nk’iyi yabaye inshuro enye mbere, muri 2011, 2013, 2018, na 2022 ibera cyane cyane mu ntara za Cape y’Iburasizuba na KwaZulu-Natal, mu rwego rwo gukomeza imikoranire hagati y’izo ngabo zombi.
Intandaro yo gusesa imyitozo y’uyu mwaka ishingiye ahanini ku kutumvikana ku bijyanye no gucunga umutekano mu gihe cy’imyitozo. Minisiteri y’Ingabo ya Afurika y’Epfo yashimangiye ko SANDF yonyine igomba gukora inshingano zose zo gucunga umutekano, harimo no kurinda indege y’ubwikorezi ya Amerika izagira uruhare muri iyo myitozo.
Iyi myifatire irimo no kwanga kwemerera abashinzwe umutekano ba Amerika kumanuka no kurinda ibikoresho byabo, ngo binyuranyije n’ibiteganywa mu masezerano ya SOFA ( State of Forces Agreement) hagati y’ibihugu byombi.
SOFA ni urwego rwemewe n’amategeko rugenga ibikorwa by’abasirikare ba Amerika ku butaka bwa Afurika y’Epfo, harimo na protocoles z’umutekano. Mu kwanga aya masezerano bumvikanyeho, Afurika y’Epfo yahatiye Amerika kureka imyitozo, kubera ko DoD yabonaga ko ibi bintu bidashoboka.
