Umuntu umwe yatakaje ubuzima abandi batatu barakomereka mu mirwano yabereye ahantu habiri muri Teritwari ya Uvira, muri Kivu y’Amajyepfo, hagati y’imitwe ya Wazalendo.
Raporo ya sosiyete sivile ivuga ko imirwano imwe muri iyo yabereye muri Gurupoma ya Runingu naho indi yabereye i Luvungi-Itara, mu ijoro ryo ku wa Gatatu rishyira kuwa Kane ushize iyariki 16 Ukwakira 2025.
Raporo ya sosiyete sivile igira iti: “Muri Teritwari ya Uvira, mu mudugudu wa Biriba, Gurupoma ya Runingu, habaye imirwano hagati y’inyeshyamba za General Nyerere n’iza General Makanika hagati ya saa kumi na saa kumi n’imwe z’umugoroba. Iyi mirwano yateje impungenge zikomeye mu baturage baho. Imibare y’agateganyo ni batatu bakomeretse.”
Sosiyete sivile yongeraho ko andi amakimbirane yabaye hagati y’imitwe ibiri yitwaje intwaro mu itsinda rya Luvungi-Itara muri Teritwari ya Uvira n’ubundi. Sosiyete sivile ivuga ko hapfuye umuntu umwe.
Sosiyete sivile iti: “Amasasu yumvikanye ahagana mu ma saa kumi, yitiriwe abantu ba Kiyaye na Kangadadi. Gutabara kw’igisirikare byihuse byafashije kugarura ituze. Umubare w’abantu bapfuye ni umwe gusa ku ruhande rwa gisirikare”.
Kuri sosiyete sivile, nk’uko bitangazwa na ACTUALITE.CD, ibyo bintu byerekana ko umutekano ukomeje kuzamba mu kibaya cya Ruzizi.
Irahamagarira “guverinoma y’intara guterana byihutirwa mu nama y’ingamba na Wazalendo zikorera mu kibaya cya Ruzizi hagamijwe guhuza ibikorwa no gukumira ibindi bibazo.
