Umusirikare wo ku rwego rwa ofisiye mu Gisirikare cya Congo, FARDC, kuri uyu wa Mbere yiyahuye yirasa mu mutwe ku muhanda wa Kalimabenge, mu Mujyi wa Uvira, ho muri Kivu y’Amajyepfo.
Nk’uko byatangajwe n’umuvugizi w’ingabo muri Kivu y’Amajyepfo, Capt. Dieudonne Kasereka, uyu musirikare ngo yirashe nyuma yo kugirana ubwumvikane bucye n’umugore we.
Yagize ati “Uyu ni ofisiye muto w’ipeti rya capitaine wirashe mu mutwe kubera ibibazo yagiranye n’umugore we. Ibi byabaye ahagana mu ma saa kumi n’ebyiri z’umugoroba ku Muhanda wa Kalimabenge muri Komini ya Kalundu”.
Nk’uko iyi nkuru dukesha 7SUR7.CD ikomeza ivuga, uyu muvugizi w’ingabo muri Kivu y’Amajyepfo yemeje ko umugore w’uyu musirikare yatawe muri yombi kandi iperereza rikomeje ngo hamenyekane uko byagenze.
