Umukinnyi w’umupira w’amaguru w’Umunyanijeriya, Theophilus Ugwu yakatiwe igihano cy’urupfu n’urukiko rwo muri Viet Nam azira kwinjiza muri iki gihugu ibiro 5,92 by’ikiyobyabwenge cya Methamphetamine agikuye muri Cambodge.
Bivugwa ko uyu yishyuwe 1000$ kugirango atware iki kiyobyabwenge.
Ugwu w’imyaka 23 y’amavuko, wagiye muri Viet Nam ajyanwe no gukina umupira w’amaguru, yakatiwe igihano cy’urupfu kuwa Kabiri ushize, itariki 25 Gicurasi n’urukiko rw’abaturage rw’Intara ya Tay Ninh, azizwa gutwara ibiyobyabwenge.
Urubuga rwa internet rwo muri Viet Nam rwitwa Thanh Nien, ruvuga ko mu ijoro ryo ku itariki 08 Werurwe 2020, ahitwa Rung Dau Hamlet, muri Komini ya Tien Thuan, mu Ntara ya Tay Ninh , itsinda rishinzwe kurwanya ibiyobyabwenge muri Polisi ya H. Ben Cau rifatanyije n’abashinzwe kurinda umupaka, bafashe Ugwu atwaye ibiyobyabwenge abivanye muri Cambodge.
Imbere mu gikapu cy’umukara Ugwu yari afite ngo yari atwaye udushashi 12 turimo ibiyobyabwenge ababishinzwe basanze ari ibyo mu bwoko bwa Methamphetamine, bipima ibiro 5 n’amagarama 92.
Uyu musore yemeye ko muri Gashyantare 2020, yageze muri Cambodge avuye muri Nigeria agiye kuhaba no kuhakorera nk’umukinnyi w’umupira w’amaguru, maze ahagana muri Werurwe 2020, mu Mujyi wa Phnom Penh City, muri Cambodge akamenyana n’Umwirabura w’Umunyamerika witwa Idoko Okwunna.
Ugwu avuga ko Okwunna yamusezeranyije kumufasha gukinira ikipe y’umupira w’amaguru izwi muri Cambodge yarangiza akamuha amafaranga yo gukoresha.
Mu masaha ya nyuma ya saa sita ku itariki 08 Werurwe 2020, Okwunna yahaye Ugwu akazi ko gutwara agakapu ko mu mugongo karimo ibiyobyabwenge ngo akavane muri Phnom Penh, muri Cambodge akajyane mu Mujyi wa Ho Chi Minh agahereze umuntu.
Uyu ngo yaremeye ndetse yishyurwa amadolari 1000 afata urugendo, afatwa agerageza kwinjira muri Viet Nam afite ibyo biyobyabwenge.
Ubwo yakorwagaho iperereza, Ugwu yireguye avuga ko we yakiriye gusa agakapu ngo akajyane atazi ko harimo ibiyobyabwenge.
Kurikira ibiganiro n’amavidewo binyura kuri Bwiza TV
